Ronaldo goal hmangin Juve champion

Cristiano Ronaldo-a goal khat hmangin Juventus chuan AC Milan 1-0 a hnehin a vawi riat nan Italian Super Cup an sawi a, Serie A champion leh Coppa Italia champion ten an inchuh ṭhin inelnaah hian sulhnu nei ṭha ber an ni nghal.

Season hmasa khan Massimiliano Allegri naute hian Serie A leh Coppa Italia nomawi an chawi kawp a, hei vang hian cup inelna final-a an hneh tak Milan nen an inkhelh a ngaih phah a ni. Gennaro Gattuso nau ten an ngam loh ngai lakah goal an chhuah leh a, midfielder Franck Kessie hnawhchhuah a nih bawk avangin result ṭha an nei thei ta chuang lo a ni.

Nikum nipui bazar lai khan Juventus hian Real Madrid aṭangin Ronaldo an lalut, an striker neih sa Gonzalo Higuain chuan loan-in Milan a pan san thung. Argentine striker hi tun dinhmunah Chelsea nen sawi zawm mek a ni a, Patrick Cutrone chu tlarhma laiah dah niin coach Gattuso-a'n Higuain hi inkhel bul a ṭan tir lo.

Juve manager Allegri-a'n srtriker Mario Mandzukic chhawr thei lo mahse, hliam vanga chawl reng Joao Cancelo a chhawr thei leh tawh a, Douglas Costa, Paulo Dybala leh Ronaldo te chu tlarhmaah a intlartir nghal - goal khung a tum tih a chiang.

King Abdullah Sport City Stadium-ah inkhel entu mipui 62,000 chuang an pungkhawm a, an beisei ang goal erawh an hmu mai lo. Juve defender Cancelo-a'n hun ṭha hmasa a hlah a, Giorgio Chiellini-a'n goal ban hrulah a tauh chhuah bakah Blaise Matuidi goal khung chu offside vanga pawm a ni lo.

AC Milan midfielder Hakan Calha-noglu-a'n box chhung aṭangin rang zetin pet mah se Wojciech Szczesny chuan a lo dan sak bakah forward Cutrone-a ball pet chu dan hman ni lo mah se cross bar a per hlauh a, Milan an vannei tawk lo niin a ngaih theih.

Team pahnih an inkhel tawk a, chungnung zawk an awm mai thei lo. Dybala leh Costa te intlanthelh vel karah Ronaldo hmel hmuh tur a awm zauh - Portugal captain hian ṭum danga a tih tawh angin bin goal tum mah se goal kham chungah a kal.

Portuguese forward dan reng theih a ni lo, minute 61-naah midfidelder ball pet thiam bik Miralem Pjanic hnen aṭanga a ball hmuh chu hnai takah a tauh lut a, keeper beiseiawm Gigio Donnarumma tan dan hman a ni lo, season kal laiah goal 16 a nei leh der tawh.

Milan lamin goal an mamawh hnuah Higuain dah lut mah se, midfielder 73-ah midfielder Kessie chu Emre Can laka a chetdan mawi lo vangin hnawhchhuah a ni a, Argentine striker awm hnuah pawh Milan hian an mamawh goal an khung thei ta chuang lo a ni.

Juventus manager Massimiliano Allegri chuan, "Thlasik chawlh neih hnua inkhel pawimawh kan hmachhawn hmasak ber a ni a, a nuamin a hlimawm hle. Team khawng tak Milan laka hnehna chan theih chu a lawmawm takzet.

"Kan team hian mamawh kan nei a, chu kan mamawh chu Cristiano kha a ni. Ani kan lakluh chhan chu chakna goal khung turin a ni a, kan mamawh leh beisei ang ngeiin a rawn che chhuak. Pjanic hnen aṭanga ball a hmuh khan a hlauhawm dawn tih a chiang nghal, ani hi danglamna chu a ni," tiin a sawi.

Italian Serie A hian thlasik chawlh an hmang mek a, tun kar tawp aṭangin league match an khelh ṭan leh tawh ang. Champion lai Juventus hian January 21 zanah Chievo an mikhual leh nghal ang.