Lampard-a nau-ten Saints an hneh

Frank Lampard-a enkawl Derby Country chuan Southampton chu penalty shootout-ah 5-3 a hnehin FA Cup third round an paltlang a, fourth round khel turin January 26 hian League One club Accrington an zin chilh leh ang.

Team pahnih te hi January 5 khan in-tawng tawhin 2-2 in an inhnehtawk. Nilaini zan St Mary's Stadium-a inkhelah Saints lamin second half minute 68 leh 70-ah Stuart Armstrong leh Nathan Redmond te hmangin goal an khung a, tlang turin an dinhmun a ṭha takzet.

Mikhual lamin Craig Bryson hmanga goal an khung pawm a ni lo a, hun tawp lam minute 20 chauh awm tawha goal hnih an phurh avangin beisei a tlem. Mahse, Harry Wilson-a'n freekick a chhuih luh bakah Martyn Waghorn chuan an siphurh a sut zo a, 2-2 bawkin an inhnehtawk.

Penalty shoot out-ah Saints tan Redmond-a'n a hlah laiin Rams captain Richard Keogh chuan chakna goal a khung thung. Derby hian FA Cup bika penalty an pet hnuhnung vawi thumah hnehna an chang vek a ni.

Derby manager Frank Lampard chuan, "Ka naute thawhrimna vangin ka lawm, kan goal pakhat VAR vanga pawm a ni lo kha chik taka en a nih pawhin a offside na kha a tlem hle, a tawpah erawh kan huaisen rah kan seng," a ti a, Southampton manager Ralph Hasenhuttl chuan an hneh loh Derby chuan huaisen taka match hnih an khelh avangin tlang an phu tih a sawi ve bawk.