Third round-ah Nadal

Australian Open seeded pahnihna Rafael Nadal chuan Matthew Ebden hnehin third round a inhlangkai. Grand Slam vawi 17 champion tawh hian world number 47 hi 6-3, 6-2, 6-2 in a hneh.

Nilaini zan inkhelah Nadal hian a service a hloh miah lo a, a khingpui service erawh ṭum nga chhuhsakin hnehna chang turin harsatna a tawk lo; a match lehpekah chuan Alex de Minaur a hmachhawn leh ang, Minaur hian inkhel inhnehtawk takah Henri Laaksonen chu 6-4, 6-2, 6-7 (9-7), 4-6, 6-3 in a lo hneh ve bawk.

Spanish player Nadal hian 2009 khan Australian Open nomawi hi a chawi tawh, kuminah hian a champion leh thei a nih chuan Open Era chinah major tournament palia vawi khat aia tam champion vek thei awmchhun a ni ang.

Nimin inkhelah Kei Nishikori chuan Ivo Karlovic nen darkar thum leh minute 48 chhunga set nga zet an khelh hnuah 6-3, 7-6 (8-6), 5-7, 5-7, 7-6 (10-7) in hnehna a chang hram.

Margaret Court Arena-a inkhelah Japan tlangval Nishikori-a'n set hmasa pahnih la mah se, service nei ṭha Karlovic-a'n vawi 56 ngawt aces vaw chhuakin a bei let na hle; a tawpah erawh player ṭha zawk a dingchang.

Inkhel dangah Milos Raonic chuan 2014 champion Stan Wawrinka chu 6-7(4), 7-6(6), 7-6(11), 7-6(5) in a hneh. Canadian tlangval hian a match lehpekah chuan season hmasa semifinalist Chung Hyeon hnehtu Herbert a hmachhawn leh ang.