Lianzuala dinhmun a chiang lo

Mizo footballer Lallianzuala Chhangte chu Norwegian club ṭha Viking FK-ah ni 10 chhung trial nei tur angin sawi ni mah se, Lunglei tlangval chuan thuleng vak mai a nih thu a sawi. 

India tana vawi nga inlana goal thum khung tawh Lianzuala hi Viking-ah trial nei tur anga sawi a nih rual hian Vanglaini chuan a be nghal a, Delhi Dynamos forward chuan, "Keimah ber hian engmah ka la hre lo a, thu lengvak mai a ni. 

"Ka agent-te nena an inbiakna mai a ni a, kei chuan engmah ka la hre lo. Ka khelhna Delhi Dynamos hian kal an phal dawn leh dawn loh pawh a la chiang lo a ni," tiin Vanglaini a hrilh.

Delhi Dynamos tana season duhawm tak hmang mek Lianzuala hian tun season-ah league match 12 khelin goal li a khung tawh a, assist vawi khat nei bawkin Indian football-a ngaihven hlawh ber pawl a ni mek. 

All India Football Federation lam chuan Norway-a Lianzuala kal tur thu hi tarlang hman mah se a hnuah erawh hmuh tur a awm tawh lo. 

Delhi Dynamos pawhin thuchhuah siamin Norway-ah Lianzuala trial tur anga sawi chu a dik tawk loh thu an sawi. Delhi club chuan, "Kan club chuan khawvel hmun hrang hranga kan thawhpuite kaltlangin kan player-te trial tura sawmna kan dawng fo ṭhin. 

"Lianzuala chungchangah pawh hian Viking FK aṭang hian an club-a trial phalsak tura dilna kan dawng ngei a, mahse engmah thutlukna siam a la ni lo," an ti.