Chak turin Halep a huaisen tawk

Tennis hmeichhe world number 1 Simona Halep chuan Australian Open match hnih a khelh tawhah harsa takin hnehna a chang hram zel. Halep hian nimin khan Sofia Kenin chu 6-3, 6-7(5), 6-4 a hnehin third round a inhlangkai.

Romanian nula hian a match lehpek atan chuan Inrinni hian Grand Slam vawi sarih champion tawh Venus Williams a hmachhawn dawn a, a tan hna a hautak chhunzawm dawn hle.

Season hmasa khan Halep hian Australian Open final a thleng, no-mawi chawi lo mah se a hnuah French Open-ah a champion avangin Grand Slam title a la thei tih a chiang tawh.

Kum 27 mi Halep chuan, "Hnehna ka chan dan hi ka sawi thiam lo," tiin chak lo tura a inngaih hnuah hnehna a chan thu a sawi, a match hmasa zawka hnehna chang tur pawhin set thum a khelh a lo ngai tawh bawk a ni.

Inkhel dangah US Open champion Naomi Osaka chuan Tamara Zidansek lakah 6-2, 6-4 in hnehna a chang ve bawk. Seeded palina Osaka hian fourth round lut tur chuan Su-Wei Hsieh a paltlang leh a ngai ang.