ISL khelh leh hun tur a chiang ta

India rama league ngaihven hlawh Indian Super League chu Asian Cup vanga an chawlh reng hnuin January 25 khian khelh ṭan a ni leh dawn ta.

Indian Super League lam chuan January 25-a khelh ṭan tur hian official-in fixture an ti chhuak tawh a, a hmain karleh Zirtawpnia ISL khelh ṭan leh hi beisei ni mah se fixture erawh ziah sual a awm nual. 

ISL chawlh hnua match khelh hmasak ber tur hi Kerala Blasters khelmualah khelh a ni dawn a, South Indian club hian ATK an lo mikhual dawn a ni. 

Official taka puanzar a nih hmaa match hmasa ber tura ngaih NorthEast United leh Chennaiyin FC chu a tuk, January 26 zanah Guwahati khawpuiah an inkhel ang.