Qatar khelmualah India tan fiahna

FIFA World Cup 2022 Qualifier-ah India chuan zanin dar 10:00 hian Asian champion Qatar an lenchilh dawn a, Igor Stimac-a naute tan fiahna hautak a ni ang. 

India hian match hmasa zawkah hun rei tak hmahruai chungin Oman chu 2-1 in an ngam lo a, Qatar an hmachhawn lehnghal dawn avangin an kalkawng a awlsam lo hle. Stimac chuan, "Engmah hlauh tur a awm lo. Ṭha taka inkhelin goal khung kan tum mai dawn a ni," a ti a, World Cup 2022 thleng tur ramah hnehna chan a tum. 

Qatar coach Felix Sanchez pawhin India a zuam ngawt bik lo. Spanish coach chuan, "Hnehna chan kan tum a nih chuan ṭha taka kan khelhchhuah a ṭul ang," a ti a, inthlahdah lo turin a naute a fuih lawk. 

Stimac-a'n 4-2-3-1 formation hmangin Oman a hmachhawn a, minute 70 hnu lamah a naute chau lo se chuan result ṭha a hlawhchhuahpui ngei a rinawm. 

Croatian coach hian 4-2-3-1 bawk hi a hmang nawn leh ngeiin a rinawm a, player pali/panga vel a thlak tur thu a sawi avangin a first XI tur hriat a harsa. Sunil Chhetri chu tlarhmaah maltlat leh tur a ni ang a, ram tan match 112-a khelha goal 72 khungtu striker hi Qatar tlarhnung tan namnul chi a ni lo ang. 

Chhetri hnung chiaha ding turin Brandon Fernandes a awm a, mual sir aṭanga nawr turin Udanta Singh-a'n bul a ṭan leh ngei a rinawm a, Ashique Kuruniyan aiah Lallianzuala Chhangte a luh a beiseiawm. 

India coach Stimac-a'n Oman an hmachhawn hmain, "Ka tan chuan thil hi a harsa ve bawk a ni. Stephen Constantine enkawlna hnuaia khel player ka nei thei lo nual. "Jeje Lalpekhlua hi en ula, ram tan a pawimawhzia kan hria a, a tel loa khelh a harsa a ni," tiin a lo sawi tawh a, Oman lakah a dikna a lang. 

Hnahthial tlangval hi awm se chuan Brandon hi bench-ah a let ang a, Chhetri tawlh hnungin Jeje Lalpekhlua tlarhmaah a maltlat thei ang. Tuna India squad-ah goal khung lama Chhetri hnaih berttu Sandesh Jhingan leh Lianzuala ten goal li bak an la nei rih lo - ram tana goal 23 khung tawh Jeje an mamawh thu Stimac-a'n a sawi hi a mak lo. 

Asian champion an nih avangin dah hniam theih an ni lo a, mahni muala khel tur an nih bawk avangin Qatar lakah India tan fimkhur a ṭul. Qatar hian India tlawm lai khan Afghanistan chu 6-0 in an nghaisa a, kawng tinrengah Afghan player-ten an ngam lo a ni ber. 

Asian Cup 2019 top scorer Almoez Ali chu ven uluk tur a ni dawn a, Al-Duhail striker hian Afghanistan lakah hattrick a siam. Spanish club Villarreal aṭanga Al Sadd-a loan-a khel mek Akram Afif hi dah hniam theih a ni lo a, zanin inkhelah India tlarhnung ten hna an ngah dawn. 

Asian champion ni thei khawpa Qatar kaihruaitu Felix Sanchez hi Barcelona youth system aṭanga coaching zir chhuak a ni a, coach ṭha a ni tih hai rual a ni lo. Barcelona chhuak a nih rualin kum 43 mi coach hian passing game ringawt a buaipui hran lo a, an team hmachhawn dan a zirin a naute khelh dan a thlak ṭhin. 

India lakah erawh attacking football an khelh ngei a rinawm a, 4-3-3 formation hmang tura beisei an ni. Blue Tigers tlarhnung an pawimawh dawn. Kum 43 mi coach hian 2012 khan Qartar Aspire Academy a zawm a, Qatar Under 19, U20 & 23 a enkawl hnuah senior team hi a enkawl chauh - tuna a player tam zawk hi a chherchhuah tih ngam a ni. 

Thawnthu keu let chuan Qatar hi India lakah inchhuang lutuk tur an awm lo. Vawi hnih intawn tawhah team pahnih hi vawi khat ve ve an chak. 1998 World Cup qualifier-ah khan Qatar hian 6-0 in India an sawp a, Blue Tigers an mualpho. Mahse, kum 2011 khan practice match-ah an intawng leh a, 2-1 in India an chak. 

India tan Sunil Chhetri leh Sushil Singh ten goal khat ve ve an khung a, Qatar tan Mohammed Razak chuan goal a la rawn khung ve reng bawk. Qatar tan Razak hming a lang phak tawh lo a, Sushil Singh chu season hmasa khan Neroca tan I League-ah a la khel - Chhetri erawh India tan goal khung khawl a la ni reng.