Australia-in Ashes an kawl chhunzawm dawn

Cricket khawvela Test hlutna vawnghimtu tia an sawi Ashes-ah Australia chuan fourth Test-ah England chu run 185 in an hneh. Series-ah 2-1 nichiahin fifth Test khelh tur la awm mah se Aussies hian inelna hnuhnung ber kum 2017 khan 4-0 a hnehna an chan avangin Ashes 'urn' hi an kawl chhunzawm dawn tih a chiang.

Fourth Test hi September 4-8 chhung khan Old Trafford-ah khelh a ni a, ṭhumvawrah Australia an chak a, bat hmasak an thlang. Aussie tan Steve Smith bawk a rawn che ṭha a, first innings-a run 211 zet a siam chu team pahnih danglamna niin England an tho chhuak lo.

Kumin Ashes-a hming langsar ber chu Steve Smith a ni a, innings vawi ngaah run 671 zet a vaw chhuak. England-in hnehna an chan ṭumin Smith hi hliam vangin a inlan lo a, hei hian Australia captain hlui ṭhatzia a pholang.

Smith hian Ashes hnuhnung pahnih pawh run 500 a vaw tling ve ve. Kum 2015 khan run 508 a siam a, 2017-18 a an rama an khelh khan 687 a siam. Ani chiah hi Ashes vawi thum a zawna run 500 siam tling vek thei awmchhun a la ni.

Australia hian Smith chet ṭhat zarah innings vawi hnihnaah pawh run 186 chauh an siam tihin an duhtawk thei a, England tan target 383 an chhawpsak.

Test thlirna aṭang chuan England tan target umphak chi rual a ni lo a, chutihrualin an ṭan tluan theih chuan Australia chelh thei dinhmunah an ding. Fourth Test-ah hian inhnehtawk se chuan Oval-ah September 12-16 chhung hian a chak zawk tur chinfel a ṭul ang.

Amaherawhchu, second innings-ah hian Aussie bowler Pat Cummins che ṭhain run 43 pein wicket li a la a, a vawm hlum ho hi top order panga zinga mi an nih avangin an chak theih nan a thawh hlawk hle. Chutihrualin vawm hlum vek a ngaih avangin Josh Hazlewood-a'n fak a phu, ani hian hnehna an chan nan Craig Overton a vawm hlum bakah Jos Buttler chelhin wicket pawimawh bik pahnih a la.

England captain Joe Root chuan, "Kan theihna zawng zawng kan chhuah a, Oval-ah beisei tur kan nei tawh lo a, pawm thiam a harsa hle. Test cricket hmuhnawm tak kan khel a, Oval-a kan inkhel tur pawh a hmuhnawm chhunzawm ang," tiin a sawi.

Australia captain Tim Paine chuan, "Inkhel boruak sang leh nung ṭha tak a ni a, huaisen a ṭul hle. Series ngaihnawm bik a ni a, Test match tin a tawp dawn thlengin chak tur a hriat lo a, mut pawh ka mutui thei lo," tiin a sawi a, Steve Smith chu player ṭha ber a nih thu a sawi bawk.