Ferrari lawmna thlentu Leclerc

Car intlansiakna khawvelah chuan Ferrari hi thil ṭha leh chungnung sawina a ni ṭhin. Italy-a hmunpui nei Formula 1 team hlun hian hun rei tak chhung chu an hmun puiah hlawhtlinna an chang thei tawh lo, tunah chuan Charles Leclerc vangin an nui ve leh ta.

Pathianni zana tlan Italian Grand Prix-ah Ferrari driver Leclerc-a'n Valtteri Bottas leh champion lai Lewis Hamilton te hnehin pakhatna dinhmun a luah. Monza tlankawng bikah hian 2010 hnua a vawi khat nan Ferrari-in hnehna an chang.

Monaco tlangval Leclerc hian tun hnai intlansiak hnuhnung pahnihah hnehna a chang ta a, driver championship-ah palina dinhmun chauh la luah mah se Mercedes driver Hamilton-a'n harsa lo taka nomawi a hum tur chu a chhaih buai rih.

Charles Leclerc hi kum 21 mi chauh a la ni a, theihna sang tak nei ni mah se Sebastian Vettel nena khaikhin ralah chuan hniam zawk rih tura ngaih a ni. Amaherawhchu, beisei aia hmain German tlangval hi a elphak dawn niin a lang.

Ferrari tana inelna vawi 14 chauh la hmachhawn Leclerc chuan, "Belgium-a hnehna ka chan kha kar hmasa mai kha a la ni, a vawi khatna a nih vangin a lawmawm takzet. Tunah hnehna ka chan erawh nasa takin a lawmawm zawk, pakhatna ka nih theih nana min puitu zawng zawng chungah lawmthu ka sawi," a ti.

Monza tlankawng hian a kum 90 tlin cham a lawm a, Italy hi motosports ngaihsanna hmun a nih bakah Ferrari-in bu an khuarna a nih avangin Leclerc hnehna chan hi a hlu bik a ni. Team thuneitu lam pawhin an driver an chhuan thu an sawi ve bawk.

Leclerc-a'n ropui taka hnehna a chan lai hian a teammate Vettel tan erawh intlansiak theihnghilh daih tlak a ni thung. World champion vawi li ni tawh hian season hmasa French Grand Prix hnuah tihsual lian vawi kua a neihna a tawng a, 14-naah a thleng hram.

Champion lai Hamilton-a'n season bul ṭan fuh viau lo mah se tun hnaiah Leclerc a ngam lo. Britain tlangval hian driver championship lamah chuan a teammate Bottas lakah point 62 zetin hma a la hruai fal tho.

Kum 34 mi Hamilton chuan, "Leclerc khan a hna ṭha takin a thawk a, hnehna an chan avangin Ferrari ka lawmpui. Keini lam chuan kan theihna sang berin theihtawp kan chhuah a, hnehna chang zo lo mah ila kan beidawng lo ang.

"Tun hnaiah keini aiin an tlan chak zawk tih chu phat tur a awm lo. Mahse, inelna hi a la zo lo a, keini pawhin car chak leh tyre ṭha zawk nen hnehna kan chang ve leh thuai ang. Tunah chuan kei leh Bottas tan inthlahdah a thiang lo lehzual ta hle a ni," tiin a sawi.

Car intlansiakna sang ber hi tun season-ah inelna 21 a awm dawn a, chung zinga 14 chu an tlan tawh. Grand Prix dang pasarih ngawt an la hmabak avangin thil thleng thei a la tam hle. Mercedes hi champion tura rinkai ni mah se Leclerc vangin ngaih ṭha takin an awm thei rih bik lo ang.