Sub Jr National Basketball C'ship-ah Mizoram an champion
Nizan khan Mizoram chuan 46th Sub Junior National Basketball Championship final-ah Punjab 51-46 a hnehin an champion.
Cuttack, Odisha-a inelna neihah hian Mizoram hian team nem deuh awmna level 2 aṭangin bul ṭan mah se Marc L. Sailo hote hian team ṭha zinga tel tur an ni tih pholangin level 2 team sawpin level 1 zingah an inhlangkai a, final-a Punjab an hmachhawn ṭum chauhin harsatna an tawk.
Final inkhel hmuhnawm bikah Punjab leh Mizoram an inhnehtawk a, point hnih khat zel chauhin an inthlau. First quarter-ah 13-12 in Punjab an chungnung. Halftime-ah Mizoram 22-23 in chungnung leh mah se third quarter a tawp chuan 35-34 in Punjab-in hma an hruai leh tawh.
Quarter tawp berah minute khat leh a chanve chauh a awm tawh tihin Emmauel VL Awmpuia freethrow hmangin an nihrual a, 46-46 chiah niin freethrow vawi hnihna rebound lain Marius Lalhmahruaia hmangin hma an hruaia an hawikir tawh lo. Final-a khel ṭha em em Emmanuel leh Lallianmawia ten 2 pts leh 1 pt neih belhin 51-46 in an chak.
Hlawhtlinna
Mizoram hi sub junior inelnaah hian ṭum hnih an champion tawh a, tun ṭum hi level 1 leh level 2 thliar hran a nih hnua an champion hmasak ber a ni.
Kum 2000 khan Mizoram hi pathumna an ni a, kum 2001-ah an champion zui nghal. Mizoram hi che ṭha chhunzawmin kum 2002 khan pahnihna an ni a, kum 2003-ah pawh pathumna an ni leh bawk. Mizoram hian kum 2006-ah a vawi hnih nan nomawi an chawi a. Kum 13 hnuah Mizoram an rawn lang leh chauh a, level 1-ah duhtawk mai loin a lungthu kim nan kumin hian an champion.
Ṭawngṭai chhanna
Mizoram coach Marc L. Sailo chuan, "Mizoram Basketball Association hnathawh a ni. Basketball ngainatute min ṭawiawm ṭhat dan hi mak kan ti zawk. Player ṭha tak kan enkawl a, NIS coach pathum Ela, Mapuia leh KC-a te fak lo thei ka ni lo," tiin lawmthu a sawi.
Marc chuan sawi chhunzawmin, "Final-a kan chak dan thlir khan Pathian kan mamawhzia a lang nawn a, kan team leh Mizo mipui ṭawngṭaina chhanin a awm. A tawp thlengin beiseina kan nei a, kan champion dan kha mumang te pawh a ang zawk. Ka player-te chungah ka lawm a, an nu leh pate min thlawpnaah ka lawm takzet bawk," tiin Vanglaini a hrilh.