Tennis Roreltu Rafael Nadal

'Ramhnuaia Sakeibaknei ang mai a ni' tia an sawi Rafael Nadal chu boruakah a zuang kang a, harsa taka a game sual chhuah lawm nan a ban hman thiam vei lam chuan na takin boruak a hnek. Spanish tlangval hian Daniil Medvedev chu harsa taka hnehin a vawi li nan US Open nomawi a chawi.

New York khawpuiah Pathianni a ni a, keini tan Thawhṭanni zing a ni thung. Arthur Ashe Stadium, Flushing Meadows-a US Open final inkhel boruak sang leh hmuhnawm bikah Nadal-a'n darkar li leh minute 50 chhungin 7-5, 6-3, 5-7, 4-6, 6-4 in hnehna a chang.

Kum 33 mi Nadal-a'n Grand Slam nomawi 19 a chawi tling ta. A chungah vawi 20 champion kum 38 mi Roger Federer a la awm. Nadal hnungah ani aia kum khata naupang zawk Novak Djokovic (16 titles) a awm thung. Tennis an chawlhsan hunah tu nge nomawi lian ngah ber tih chu hunin a la herchhuahpui tur a ni.

US Open hma khan Rafael Nadal leh Daniil Medvedev te hi vawi khat chiah an la intawng. August 12 mai khan Canadian Open final-ah inkhelin Nadal hian awlsam takin hnehna a chang. New York khawpuia final-ah pawh Nadal-a'n set hmasa pahnih a la nghal - a awlsam leh dawn niin a lang hman.

Mahse, seeded pangana Medvedev-a'n service nei ṭha zawk a nihna leh forehand ṭha hmangin set thumna a la. Set linaah Nadal hian 5-4 in a hniam zawk laiin service a hloh a, set a chan zui bawk. Nomawi chawi tur zawk hre turin set ngana khelh a ngai.

Set lina tawp lam leh set ngana tir lamah Medvedev hian point 20 awm thei zinga 15 zet a hmu a, dinhmun hima inngai tawh Nadal a chhaih mangang takzet. Boruak a sang a, stadium chhunga fan-te chuan 'Rafa, Rafa, Rafa' tiin au rual mah se Russian tlangval huaisen a buai phah duh bik lo.

Hun pawimawh vawrtawpah Nadal-a'n a tawnhriat ngah a chhawr ṭangkai. Set hnuhnung berah 2-2 a nih hnuin a khingpui service hi vawi hnih ngawt a chhuhsak hlauh, match point a hmuh hmasa pathum erawh a lo thlawnin a luan raltir thung.

Spanish star hian 5-4 a nih hnuah a service a, a first serve hmasa pathum a dik lo vek! Second serve hi a nat tawk loh avangin a buai zui thei dawnin a lang hman. Amahaerawhchu, a hunah tak 'Nadal' a nihna lantirin a first serve na tak chu Medvedev-a'n vaw out-in a champion theih phah.

Player pahnihin mahni inven hmasak a pawimawhzia an hria, chutihrualin an khelh dan phung pangngai 'attacking game' an kalsan thei lo. Fimkhur tak chunga an innawr tawn chu hmuhnawm tak a ni, tun US Open bik aṭanga teh chuan khawvela tennis player ṭha leh hmuhnawm an ni mek. 

'King of Clay' tiin Nadal hi hming lem vuahsak a ni a, French Open vawi 12 champion thei a nih avangin a inhmeh thlap. Tennis player zinga ropui ber tia fak an ngam lohna chu inelna dangah a hlawhtling tawk lo tih a ni ṭhin.

Amaherawhchu, Nadal hian Wimbledon title pawh pahnih a la tawh a, Australian Open nomawi vawi khat a chawi tawh bakah US Open-ah pawh vawi li zet a champion ta. A sulhnu leh hlawhtlinna enin famkim bik lo mah se, a ṭha ber a nih loh pawhin a ṭha bikte zingah chuan a tel chiang a ni.

Hliam nei loa a khel zel thei a nih chuan Nadal hian amah aia kum nga zeta upa Federer-a record ropui hi a khum theih ngei a rinawm ta hle, ani aia kum khat chauha naupang Djokovic hi hla takah a tlansan thei bawk. Chutihrualin, vanduai chuan nomawi lian dang lak belh tawh miah loin a hun tawp a hmang ve thei tho. 

Thil thleng thei tam tak a la awm, chiang taka sawi theih chu 'Big Three' te hi mimalin an ropui em em vek a, an pathuma an hun hman a inrual hian tennis hmuhnawm leh ropui bik chungchuang min chhawp chhuahsak a ni.