Sangtea KO-in a chak

World Youth Title chuh tur Lalrinsanga chuan Inrinni zan khan Mumbai Infiniti Mall-ah khawtual tlangval Prince Shriwastava chu Super Featherweight category-ah technical knockout hmangin a hneh. Professional fight-a vawi khat inlanna Vanlalawmpuia pawhin round hnihna lekah Ashish Sharma chu a knockout a, AwP-a inlanna hi superlightweight category a ni.

Mizo tlangval Sangtea leh Prince Shriwastava te inhnek hi main event atan hman a ni a, Khawruhlian tlangval hian June 3, 2020-a Hidari Mchanjo a hmachhawn hnua a inlan leh hmasak ber avangin round hmasa berah a fimkhur hle.

Second round-ah Sangtea a insiamrem ṭan a, round hmasa ber aiin a hnek chhuak tam ta zawk. Round thumnaah phei chuan Mizo tlangval a chungnung lawrlak tawh a, referee-in Prince Shriwastava dinhmun ngaihtuahin inhnek a ti tawp.

Professional fight a hmachhawn hmasak berah Khuangthing tlangval Vanlalawmpuia a hmuhnawm hle. AwP-a hian first round hi a khingpui Ashish Sharma zir nan a hmang a, second round-ah a khingpui pan chilhin a hnek fuh tam a, knockout hmangin hnehna a chang.

Mizoram sports minister Robert Romawia Royte chuan boxer pahnih hi a hmunah a ṭawiawm a, Rs 10,000 ve ve a pe. Boxer pahnih hi Sibyfarms ten an sponsor.

March 6 hian R. Dengṭhuama Hall, Mualpuiah Mizoram professional fight hmasa ber 'LPS Fight Night' a awm dawn a, hetah hian Sangtea leh Ghanaian boxer Eric Quarm ten Super Featherweight-ah World Youth Title an inchuh dawn. 

Khuangthing tlangval AwP-a hian Indian boxer Rakesh chu Superlightweight category-ah a hmachhawn dawn. LPS Fight Night-ah Mizo boxer ṭha dang Republic Veng tlangval Zochhuanawma Fanai, Cherhlun tlangval F. Zoramchhana leh  Mualpui tlangval C. Lalhruaitluanga te an inhnek bawk dawn a ni.