Man United tan thlasik a tawp! Arsenal nen an inhnehtawk

Ramtuk thla kan chuangkai ṭan chauh a, boruak la vawt viau mah se Manchester United tan chuan thlasik a tawp rih niin a lang. Premier League table chung ber boruak vawt aṭangin Man United hi hnuk thlak an ni.

Inrinni zan Emirates Stadium a inkhelah Arsenal leh an mikhual Man United 0-0 in an inhnehtawk. Inkhel dangah Manchester City an chak bawk si avangin, manager Pep Guardiola naute chu match khata khel tlem chungin league hmahruaitu nghet an ni ta.

United striker Edinson Cavani-a'n ni danga a khung ṭhinna anga ṭhaah vawi hnih a hlah a, Uruguay international hian hnai tak aṭangin hun ṭha nei mah se goal zawnah a pet thei lo - Aaron Wan-Bissaka cross a khung loh kha a ngaihtuah nawn hnuah a ui zual ang.

Alexandre Lacazette-a'n freekick aṭangin bar a per dawp a; United keeper David de Gea-a'n rawlthar Emile Smith Rowe khung tur a dansak bakah forward Nicolas Pepe pet chu goal sira kal turin a ti per hman bawk.

De Gea ang bawkin Bernd Leno pawhin hna hautak thawh tur a nei. Gunners keeper hian box pawn aṭanga Fred khung tur chu rang taka zuang chungin a dansak hman chiah. Marcus Rashford leh Willian te pawhin an hun ṭha neih an thleng nawi ve ve a ni.

Mikel Arteta-a'n an ṭhat dan berin a naute a rem thei lo, striker Pierre-Emerick Aubameyang chu mimal thil vangin a la inlan thei lo. Season kal laia an player pawimawh pahnih Bukayo Saka leh Kieran Tierney te hliam vangin an chawlh a ngai bawk.

Thomas Partey leh Granit Xhaka te inkawpin tlarhnung an pui ṭha a, defender Rob Holding leh David Luiz te tana hna hautak tur tam tak an lo chinfelsak hman ṭhin - 2019 April thla hnua vawi khat nan an mualah a zawnin match li goal chhuah loin an kaltluang ve ta.

Goal khung kawngah erawh hmasawn an ngai. Striker Lacazette chu defender palian Harry Maguire leh Victor Lindelof ten an chepral thei a, French striker thlawptu Smith Rowe chu hun pawimawh laiah a ruh a la no deuh tih a lang - ball pek dik tura ngaih pek sual a nei zauh ṭhin.

Arteta naute tan goal chhuah loa point hmuh a hlu, chutih rualin FA Cup aṭanga an tlak tawh avangin season thara European football khel tur chuan league-ah an thlen san a ngai, mahni muala point thum hlawh chhuah loh kha a la pawi thei.

'Class of 1999' te khan an vanglai khan khualmuala league match 17 chhung tlawm an nei lo, season khat chhungin nomawi lian pathum an chawi hial. Record ropui tak hi Gunnar Solskaer nauten tlawm lo rei record hi an rawn khum a, nomawi an chawi ve dawn em tih erawh zawhna lian tak a ni.

Arsenal lakah hliam vangin midfielder Scott McTominay lakchhuah a ngai, forward Anthony Martial-a'n thlakin Solskjaer-a'n Paul Pogba khelh dan a thlak a ngaih phah a, ruahmanna thlak a ngaih avangin an duhthusam angin an khel bik lo. 

Man United lamin ball chang hnemin inkhel an thunun zawk, mahse playmaker Bruno Fernandes chu danbeh a ni. Portugal international hian Luiz buma hun ṭha a insiam a hlah bak chu goal khungna remchang a nei lo, a vanneih zan ni se chuan chakna goal khung thei a ni thung.

United khelh dan thlirin point thum an hmu lo kha an ui ang, chutih rualin Ole-a'n a elpui club lian zinga nem bera ngaih Arsenal lakah chak ni hmel a hmu thei lo a, league champion nih an duh a nih chuan club lian laka point thum hmuh an zir a ngai.

"Inkhel result 'fair' tak a ni. Team pahnih khan chak theihna hun ṭha kan nei ve veah ka ngai. Kan player pawimawh tak pathum an inlan thei lo a, khatiang chunga ka naute khelh dan khan a lawmawm, second half-ah khan chak theihna hun ṭha kan insiam nual," - Mikel Arteta

"Arsenal, Chelsea, Manchester City leh Liverpool kan hmachhawn ṭumte hi chhut ila, tlarhnung kan venghim ṭhain kan khel chhe ngai lo. Mahse inkhel thunun chunga goal khung theina hun ṭha kan insiam kan chhawr thei lo ṭhin hi a pawi," - Ole Gunnar Solskjaer

*2017-18 season khan Arsenal-in an mual leh khualmualah United an hneh lo, a hnu lama vawi ruk an intawn leh tawhnaah erawh tlawm an nei lo. 1980 October aṭanga 1983 May thla chhung United laka an tlawm loh hnuah tun ṭum hi chak loh nei loa an kal tluan rei leh ber a ni.

*United hian 1981 September aṭanga 1983 May thla chhung khan Arsenal lakah a zawnin match li chhung goal an khung lo, tun hnai an intawn hnuhnung pathumah pawh Gunners lakah goal an la khung thei lo.

*Kum 2014 February thla hnu lamah Arsenal leh Manchester United te league match bikah goal awm loa an inhnehtawk lehna hmasa ber a ni.

*Ole Gunnar Solskjaer-a'n United a enkawl hnuah Arsenal hi Premier League-ah vawi nga a hmachhawn tawh a, chak a la nei lo.

*Arsenal hian 2019 April thla hnua a vawi khat nan an mualah a zawnin match li chhung goal an chhuah ta lo.