Northeast Derby-ah Aizawl FC an chak

Mizo club Aizawl FC-in Inrinni tlai khan Manipur club Neroca 2-1 in an hneh a, I League round 5 khelh zawhah AFC hi pahnihnaah an awm. Aizawl FC hian February 3, Nilaini zan dar 7:00-ah league hmahruaitu Churchill Brothers an hmachhawn ang. 

Mohun Bagan Ground, Kolkata-a inkhelah Mizo club tan PC Laldinpuia'n goal hmahruai a khung a, Judah Garcia hmangin Manipur club-in an sut. Siaha tlangval MC Malsawmzuala'n minute 56-naah chakna goal a khung a, man of the match-ah goal hmahruai khungtu leh tlarhnung innghahna Samthang tlangval Dinpuia thlan a ni.

Aizawl FC-in club dang zawng zawngin an hneh Indian Arrows lakah point khat chauh an hlawh chhuak a, coach Yan Law chuan an rilru put hmang dik loh vang a nih thu a sawi. Yan-a'n quarantine hun a hmang zo a, Neroca nen an inkhelh ṭumin technical area-ah a vawi khat nan a awm.

Amaherawhchu Northeast Derby tura inpuahchahnaah defender Richard Kassaga a inhliam a, Ugandan defender aiah Mizo defender chak ṭha Lalchungnunga a lut a. Durtlang tlangval Chungnunga hi amah ang bawka chak Dinpuia nen an inkawp.

Tlarhmaah Nigerian striker Princewill Emeka bul ṭantir a ni a, ball sem turin midfielder fing R. Malsawmthanga chu captain Alfred Kemah Jaryan nen an inkawp a, winger ṭha pahnih Brandon VL Remdika leh Ramhlunchhunga te chu mualsir aṭanga nawr turin an awm bawk.

Aizawl FC an insiamṭha tih a lang a, a tir aṭangin an goal bawh a na. Tlarhmaah foreign striker Princewill-a awm chu Neroca tlarhnung tan ven a ṭul a, chutihrualin Mizo club-in set piece an hmang ṭha zawk.

Chhunga leh Brandon te an hmuhnawm a, Msa corner petin Neroca tlarhnung a ti buai ṭhin hle. Aizawl FC-in minute 37-naah goal an khung ta a, Msa croner pet chu Dinpuia'n ṭha takin a tauh goal. 

First half-ah Chhunga'n chance ṭha pahnih a hlah a, Mizo club vanduai lo se goal tam zawk khung thei tur an ni. Amaherawhchu minute 49-naah Neroca striker Judah Garcia-a'n box pawn aṭangin ṭha zetin a pet a, Zothanmawia aia lut keeper Lalmuansanga dem theih a ni lo.

Manipur club-in phurna thar nei mah se team ṭha zawk Aizawl FC-in MC Malsawmzuala tauh luh hmangin minute 56-naah hma an hruai nawn a, goal dang a lut tawh lo. AFC tlarhnunga ding Mizo tlangval Dinpuia leh Chungnunga te an khel ṭha hle.

Neroca player Akbar Khan leh Varney Kallon te injury time-ah hnawhchhuah an ni a, player pakuain an khel tluan. Gift Raikhan-a hote tan February 3, Nilaini tlaia Mohammedan SC an hmachhawn hunah hmabak a harsa sawt ang.

Inrinni zan I League inkhel dangah Gokulam Kerala leh Real Kashmir te goal awm loin an inhnehtawk. Zirtawpni zanah Churchill Brothers leh Trau te 1-1 an inhnehtawk tawh bawk.

Kumin I League-ah hian team 11 an awm a, vawi khat ṭheuh an inkhelh kual zawhah a sang parukin champion tur an zawng dawn a, a hniam pangain relegate tur an zawng ang. Mizo club hi pahnihnaah awm rih mah se pasarihna Chennai City nen an inkarah point khat chauh a awm a, hmabak a la awlsam lo.