Jeje-a a dam ṭha leh ta

India striker ṭha Jeje Lalpekhlua chu khup hliam vanga hun rei tak a buai hnuah ngai a awh leh ṭan. Zirtawpni zan khan Jeje khelhna East Bengal leh FC Goa te 1-1 in an inhnehtawk a, Kolkata club tana Danny Fox-a khung theih nan Jeje-a a ṭangkai hle.

Fatorda Stadiuma-ah East Bengal-in bul an ṭan ṭha a, second 20 lekah Narayan Das-a'n penalty a hlawh chhuak. Amaherawhchu Norwich City leh Wigan Athletic striker hlui Anthony Pilkington-a'n goal zawnah a pet lo.

Inkhel a nung ṭha a, Atletico Madrid tan pawha khel tawh Alberto Noguera ball fing zet chu Spanish striker Igor Angulo-a'n harsatna nei loin minute 39-naah goal-ah a chantir.

East Bengal point hmu lo thei dinhmunah an ding a, minute 65-naah Pilkington-a'n freekick a pet a, huai takin Jeje-a a inbarhlut. Hemi perah hian Danny Fox-a'n siphurh sutna goal a khung.

Minute 66-naah Goa midfielder Edu Bedia chu hnawhchhuah a ni a, player tam zawka khel East Bengal-in goal dang an khung belh theih tawh lo a, 1-1 in inkhel a tawp.

Hnathial tlangval Jeje chuan, "Ka dam ṭha ṭan a, fitness pawh a ṭha chho ṭan. Inrintawkna nei turin khelh tam a ngai a, goal khung ka mamawh bawk. Kar hnih vel chu nuam ti takin training ka nei thei tawh a, a hmaa kan tih ṭhat ngam loh tam tak kha ka ti leh thei tawh a ni," tiin Vanglaini a hrilh.