Bayern Munich an fal chho zel

Bundesliga-ah champion lai Bayern Munich-in Inrinni zan khan Hoffenheim 4-1 in an hneh a, pakhatna dinhmun an sawhnghet. Inkhel dangah RB Leipzig-in Bayer Leverkusen 1-0 in an hneh a, Leipzig hian point sarihin Bavarians an pha lo. Leverkusen erawh point an hmuh loh avangin palinaah an tla thla a, pathumnaah Hertha Berlin hnehtu Eintracht Frankfurt an insawn chho thung.

Bayern Munich-in Allianz Arena-ah Jerome Boateng, Thomas Muller, Robert Lewandowski leh Serge Gnabry te hmangin an khat mawi tawkin goal an khung a, Hoffenheim-in 2-0 a an hnu fual laiin Andrej Kramaric hmangin goal khat an khung ve bawk.

Bavarians tan chanchin ṭha hriat tur a tam. Muller-a'n 2015-16 season hnua a vawi khat nan league-ah double digit a khung tling ta a, tun season-ah match 19 chiah an la khel chungin goal 10 a khung der tawh.

Serge Gnabry-a'n nikum October 31 hnuah goal a khung leh ta a, inrintawkna a neih let chuan tlarhmaah Bayern goal nawr a hlauhawm sawt ang. Kum mi 32 Lewandowski-a'n a vanglai a hmang chho mek a, goal 24 a khung tling tawh.

Espanyol aṭanga Bayern zawmtu midfielder Marc Roca-a'n midfield-ah ṭangkaina a nei tih a pholang a, tun dinhmunah chuan Covid-19 dan bawhchhiat vanga club-in a hrem mek Corentin Tolisso aiin a thlanawm zawk hrim hrim.

Chutihrualin Bayern tlarhnung erawh a phui lo a, Manuel Neuer nei lo se goal tam zawk an chhuah ngei ang. Hansi Flick-a'n Champions League nomawi humhim turin tlarhnung thuam ṭhat dan a ngaihtuah a ṭul dawn a ni.

Red Bull Arena-ah mual neitu RB Leipzig-in pahnihna luah chhunzawm turin Bayer Leverkusen 1-0 in an hneh a, goal awmchhun hi minute 51-naah Christopher Nkunku-a'n a khung.

Champions League aṭanga Manchester United pet chhuatu Leipzig hi Bundesliga-ah a pawh belhchhian an dawl a, tun dinhmunah chuan champion lai Bayern Munich elpha ber an ni.

Borussia Dortmund-in league match vawi thuma chak hmel an hmu loh hnuah Augsburg lakah goal thum khungin 3-1 in hnehna an chang. Dortmund tan hian Thomas Delaney leh Jadon Sancho ten goal khat ve ve an khung bakah Augsburg player Felix Uduokhai-a'n a lamah a ti lut bawk.