Man City tan Jesus goal khat a tawk

Premier League season chawhnu lam an hmang ṭan a, inkhel hmuhnawm chhawp chhuak ṭhintu Manchester City chu hmahruaitu niin nomawi chawi tura rinkai ber an ni mek - City hian Gabriel Jesus goal khat hmangin Sheffield United 1-0 in an hneh.

Inrinni zan Etihad Stadium a inkhelah City tan minute kuana lekah Jesus-a'n goal awmchhun a khung a, table mawngphah luahtu Sheffield lamin goal an chhuah loh bakah hun tawp dawnah John Fleck-a'n si phurh a sut teuh hle.

Guardiola enkawl City hian a zawnin match 12 chhung hnehna an chang ta. English football inelna sangah hian Arsenal (2007 October) hnuah a zawna vawi 12 chhung chak thei leh hmasa ber an ni.

Sergio Aguero awm loh karah Jesus tan hun ṭha a inhawng a, mahse Brazilian striker hian goal a khung hleih theih loh avangin inkhel bul ṭantu zingah thlan a hlawh lo. Sheffield lakah hun ṭha pek a nih chu a thamral tir lo, hmun a chan chhunzawm pawh a beiseiawm.

Hliam vangin Kevin De Bruyne a chawl a, forward Raheem Sterling leh Riyad Mahrez te chu bench lamah hun hmantir an ni bawk. Ferran Torres thawhrah sangin Jesus-a'n hnai tak aṭangin a khung - Sheffield tlarhnung hna thawh ṭhat loh vangah a puh theih bawk.

Nidang ang bawkin Man City tlarhnung a phui chhunzawm. John Stones aiah Aymeric Laporte a rawn ding a, mual sirah Joao Cancelo chu chawlhtir niin Oleksandr Zinchenko a awm bawk; player siksawi mah se Ruben Dias hoin an ding khawng hle.

Guardiola-a'n team enkawl hna a thawh aṭanga chhutin match 500-ah a naute a chakpui ta chiah, mellung pawimawh phun tur hian match 673 chauh a mamawh. City hma hian Barcelona leh Bayern Munich te a lo enkawl tawh.

Spanish manager chuan, "December leh January thla chhunga hetianga kaltluan theih hi chu a ropui hle. Ka nauten an khel ṭha tluang em em a, tun ṭumah pawh khan hun ṭha insiam hnem lo mah ila point thum hmuhna tawkin kan khel thei," a ti.

City hian match 20 aṭanga point 44 hmuin table chung berah an awm, pahnihna Manchester United aiin khelh khata khel tlem chungin point thumin an sang. Chak lo Sheffield erawh point riat chiah an la neih avangin season tharah EPL an khelh a rinawm tawh lo.

Carlo Ancelotti enkawl Everton-in European football sawi ri ngam mah se an mikhual Newcastle United lakah an chesual. Toffees hian goal an khung theih loh an tuar a, hun tawp kamah mikhual tan Callum Wilson chuan goal hnih khungin Magpies 2-0 in an chak.

Jack Grealish hoin Aston Villa pawh an kaltuang zel. English midfielder hian Ross Barkley goal khung tur siamsakin Southampton 1-0 in an hneh. Villa chak theih nan hian Emiliano Martinez a pawimawh, Arsenal keeper hlui hian Che Adams khung tur chu ṭha takin a dansak a ni.

Inrinni zan Premier League inkhel dangah tlak hlau West Brom leh Fulham te 2-2 a inhnehtawkin point an insem a; Chelsea laka point hlawh chhuak thei Wolves chu Crystal Palace mualah 1-0 in an tlawm thung.