Northeast United tan Khalid-a magic

I League-a Aizawl FC champion puitu Khalid Jamil-a'n chak dan hmang a hria tih a lantir zel. Inrinni zan khan Khalid-a kaihhruai Northeast United chuan Indian Super League hmahruaitu Mumbai City chu 2-1 in an hneh. Zanin dar 7:30 hian table mawngphaha awm Odisha leh Jamshedpur te an inkhel ang.

GMC Stadium-a inkhelah Northeast United-in bul an ṭan ṭha a, minute 10 chhung lekin Deshorn Brown-a goal hnih hmangin hma an hruai. Gerard Nus thlaktu Khalid hian goal hniha hma an hruai hnuah tlarhnung a rem phui a, ball chang tlem mah se point thum hlutna an hre chiang.

Northeast United hmachhawn hmaa match 12 hneh loh nei tawh lo Mumbai lamin point hlawhchhuah tumin theihtawp an chhuah a, minute 85-naah Adam le Fondre hmanga an goal khung bak an khung belh thei lo. 

Khalid-a hnuaiah NEUFC-in match thum an khel tawh a, an chak vek. Jamshedpur an hneh hnuah table chunga awm pahnih ATK Mohun Bagan leh Mumbai City te an hneh a, palinaah an awm ta. Northeast United-in risk lain coach Gerard Nus an ban a, Khalid-a magic hmangin knockout khelh an inbeisei ta hle.