Copa Libertadores-ah Palmeiras an champion

South America-a football inelna sang ber Copa Libertadores-ah Palmeiras an champion a, final-ah 1-0 in Santos an hneh. 

Maracana, Rio de Janeiro-a final khelhah goal hmuh tur a awm lawk lo a, injury time minute kuanaah kum 25 mi Breno Lopes-a'n a khung. 

Copa Libertadores hi Europe club-te inelnaa a tlukpui chu Champions League a ni a, he inelna hian South America-ah ngaihhlut a hlawh hle.

Tun ṭum inelna hi nikum January 21 aṭanga ṭan kha a ni a, amaherawhchu match hnih lek an khelh hnuah nikum September 30 khan khelh chhunzawm a ni leh chauh a. Kumin January 30 khan final hi khelh a ni.

Inelnaah hian ram 10 aṭangin team 47 an tel a, Brazil-in lai Flamengo an kawl avangin team riat ngawt an thawh a, Argentina-in team ruk an thawh ve bawk.

Kumin inelnaa hian Argentina leh Brazil ten club pahnih ve ve an thawh a, Brazil an chungnung ta zawk. Santos hian final lut turin Boca Juniors 3-0 in an hneh a, Palmeiras-in River Plate 3-2 in an hneh.

Final-ah Brazilian team pahnih an inhnehtawk a, a tawpah Palmeiras vannei zawkin a vawi hnih nan Copa Libertadores nomawi an chawi. Copa Libertadores-a champion ngun ber erawh Independiente an ni a, vawi sarih an champion tawh a, Boca Juniors (6) leh Penarol (5) ten an dawt a ni.