Champion tum Milan, Inter leh Juve an chak

Tun hnai season 10 chhunga Serie A nomawi inchuh boruak san ber ṭuma ngaih kan tawng chho mek. Champion lai Juventus bakah season kal laia an umphak rih loh AC Milan leh Inter Milan ten hma lam an pan zel.

Inrinni zan Italian Serie A inkhelah hmahruaitu Milan chuan an mikhualna ramah Bologna 2-1 in an luhchhuah a, pahnihna Inter chuan an mikhual Benevento 4-0 a sawpin an chunga awm an thlah fal duh bik lo.

A zawna vawi kua champion tawh Juventus pawhin khualmualah Sampdoria 2-0 in an hneh ve bawk a, Old Lady hi pathumna ni mah se an chunga mite aiin match khatin an khel tlem zawk - an tan 'Scudetto' chu humhim theih a la ni.

Zlatan Ibrahimovic-a penalty pet chu Bologna goalkeeper Lukasz Skorupski chuan lo dansak mah se, mikhual Milan tan Ante Rebic leh Franck Kessie ten goal an khung a, hun tawp dawna Andrea Poli goal khungin awmzia a nei phak lo.

Season duhawm hmang mektu Rossoneri hi tun hnaiah an chesual zeuh, an match hnuhnung pahniha an chak loh hnuah an tho chhuak leh ta - tunah chuan kawng dik zawh chhunawm an tum leh tawh ang.

Milan coach Stefano Pioli chuan, "Point khat chauh pawh hi kan ngaihlu tur a ni a, season tawpa min daidang theitu chu thil hote a kan ngaih hi a ni thei tih hriat a ṭha. Atalanta leh Inter laka kan khel ai khan tunah chuan hmasawnna a awm leh tawh," a ti.

Coppa Italia lamah Ibrahimovic leh Romelu Lukaku an intibuai a, social media lamah an buai chhunzawm. Khelmual chhungah erawh Lukaku a buai zui zel lo - goal hnih khungin a team a chakpui.

Inter tan hian striker palian Lukaku bakah Lautaro Martinez chuan goal khat a khung a, forward Riccardo Improta chuan anmahni lamah ti lut palh bawkin nuamsa takin Antonio Conte naute an chak.

Inter Milan hian Thawhlehni zanah Coppa Italia semifinal khel turin Juventus an hmachhawn dawn. February 6, Zirtawpni zanah Fiorentina nen Serie A an khel lehnghal ang. Conte chuan, "League match an khelh tur chu kar leh lama sawn hlat awm tak a ni," a ti.

An chunga awm AC Milan inkhel result hre sanin Juventus an inlan a, hmahruaitu an phak lohna chu point 10 a ni hman. Mahse, Federico Chiesa leh Aaron Ramsey te goal hmanga hnehna changin Milan nen an inkar an sawi zim.

Andrea Pirlo naute hian tun hnai inelna hrang hranga an match hnuhnung paliah hnehna an chang vek a, an thiampuipa Cristiano Ronaldo-a'n goal khung rih lo mah se Old Lady manager hian an khelh danah a lawm thu a sawi.

Juve manager Pirlo chuan, "Goal khungtu zingah Ronaldo hming a lang lo a ni mai thei, mahse goal kan neih theih nan a thawh hlawk. Goal pahnih kha a bul ṭanna zingah Ronaldo a tel. Goal khung thei leh ṭha taka khel thei player kan ngah hi a lawmawm," a ti.