Australian Open a hmuna entu awm dawn

Hrileng karah Australian Open 2021 chu a hmuna entu fans an awm thei dawn. Inelna neihna tur khawpui Melbourne awmna Victoria state sorkar thuneitu lam chuan entu awm theih tur thu hi an ti chiang.

Ruahman dan chuan nikhatah fans 30,000 an awm thei dawn. Heng mite hi hmun khata awm tur tihna a ni lo, tournament hi court hrang hrang 25 zetah khelh a ni dawn a, hmun hran hrana kal zawng zawng zat tur tihna a ni.

Nikhata fans 30,000 awm theih tur hi a tir lam ni riat chhung atana tih a ni a. Quarterfinal-aṭang chuan tournament khelhna court a tlem tawh dawn a, nikhatah fans 25,000 chauh an awm thei thung ang. 

Victoria sports minister Martin Pakula chuan, "Ni 14 chhungin Melbourne Park-ah mi 390,000 vel an kal thei dawn tihna a ni a, tun hnaia inkhel en ṭhin aṭanga chhut chuan a zatve pawh an tling dawn lo.

"Kum dang ang bawkin Rod Laver Arena chu ngaihhkut a ni leh dawn, mahse season danga a boruak ropui tak ang kha chu a phak dawn lo tih a chiang. Amaherawhchu, keini lam chuan mipui himna leh hriselna kan ngaih pawimawh a ngai," a ti.

Australian Open hi hri leng vangin a khelh hun pangngai chu sawn hlat a ni. February 8-21 chhung hian khelh a ni dawn, a tirah chuan a hmuna entu awm thei lo tura ngaih ni mah se hri lengin ziaawm lam a pan leh tak avangin ruahmanna an siam thar.

Tournament khel tur player leh coaching staff chuan ni 14 chhung khunghran an nihna an hmangzo tawh hlawm a, nikhatah darkar nga chhung training an nei thei. Player ṭhenkhat erawh hrileng kaihhnawih vangin khunghran ngai an la awm.