Levante lakah Real Madrid an tlawm
Spanish champion Real Madrid ke chheh a nghet thei lo. Zinedine Zidane enkawl team hi an mikhual Levante lakah 2-1 in an tlawm a, an tan La Liga nomawi humhim chu thil harsa a ni tawh dawn.
Inrinni zan Santiago Bernabeu Stadium a inkhelah, defender Eder Militao chu minute kuana lekah hnawhchhuah a ni. Player kim loa khel Real lamin Marco Asensio hmangin goal khung hmasa mah se mikhual lamin Jose Luis Morales leh Roger Marti te hmangin an chhang let.
Zidane a lo kir, mahse...
Coronavirus vangin Zidane-a'n Alaves an hmachhawn ṭumin khelmualah a naute a ho thei lo. Lavente lakah team a kaihruai thei tawh a, an beisei leh duh ang result erawh an nei thei rih ta chuang lo.
Hliam vangin Sergio Ramos a chhawr thei lo a, captain a awm loh vang hian Raphael Varane bula ding turin Militao a thlang. Mahse tlarhnung laia ding pahnih hi minute 10 chhung pawh an ding dun hman lo a ni.
Penalty box pawnah Militao hian Sergio Leon a tih tluk vangin yellow card pek a ni. Thil thleng hi VAR hmanga ennawn a nih hnuah red card pek a ni ta zawk. Real hian goal hnih aia tam chhuah theih tur an ni, mahse keeper Thibaut Courtois-a'n Marti khung tur ṭha takin a dansak.
Real an ral?
Spanish champion hi league match hnuhnung vawi 10-ah an chak lohna hmasa ber a ni. Amaherawhchu, tun hnai inelna hrang hrang an khelh hnuhnung pali aṭangin vawi thum ngawt an tlawm; an hneh loh zingah third division club Alcoyano pawh an tel.
La Liga table hmahruaitu Atletico Madrid an phak lohna chu point sarih a ni a, Real hian match hnihin an khel hnem zawk. Nomawi humhim tur chuan anmahni chet ṭhat ringawt a tawk zo tawh dawn lo, midang chetsual an ngaihchan tel a ngai tawh dawn.
Inkhelh banah dinhmun derthawng nia sawi Zidane ni loin assistant coach David Bettoni zawkin media a hmachhawn. Bettoni chuan, "Kan dinhmun ngaihtuahin kan lawm lo, mahse keini chuan a tawp thlengin kan bei zui dawn a ni," tiin a sawi.