Goal nga khungtu England dinhmun a ṭha

Euro 2020 qualifier-ah England-in goal an sur tir a, an mikhual Kosovo lakah goal nga ngawt khungin 5-3 in an hneh. 

Kosovo-in England an len chilh hma kha chuan qualifier-ah ngamtu an tawng lo a, St Mary's Stadium-a an inkhelh meuh erawh chuan goal nga an chhuah. 

England-in match thum an khelhah hnehna an la chan vek avangin point 12 an nei a, Czech Republic-in 3-0 a Montenegro an lo hneh bawk si avangin Kosovo erawh pahnihna aṭangin pathumnaah an tla thla. Three Lions tan Jadon Sancho chu player langsar a ni a, Borussia Dortmund forward hian goal hnih a khung - ram tana goal a khung hmasak ber a ni. 

St Mary's Stadium-ah England-in an ngaihtuahna pawh an siamṭhat hmain Kosovo an inlar thut a, Michael Keane tihsual zarah Valon Berisha chuan goal hmahruai a rawn khung. 

Kosovo fans an phur a, England chhaih kawlhna goal a ni tih reng an hre lo. Minute sarih chauh a liam a, Three Lions tan Raheem Sterling chuan si phurh a rawn sut - Keane siamsak a ni. Minute 19-na a ni a, pet goal tu niloin siamsaktuah Sterling a ṭang - Harry Kane tana a pek chu England captain-in khung turin harsatna a nei lo a, ram tan match 41-a khelha a goal 26-na ni turin a khung. 

Jadon Sancho-a rawn lang a, Bundesliga 'star' ball cross hi Belgian club Standard Liege defender Mergim Vojvoda chuan an lamah a ti lut. 

Kum 19 mi Sancho-a'n a duhtawk lo. International-a hming chher turin a upa tawk tawh tih a pholang a, minute 44-naah ram tana a goal hmasa ber a rawn khung. England fans authawm pawh a reh hmain Sancho hian first half hun pek belhah a goal hnihna a rawn khung leh a, Three Lions-in 5-1 in hma an hruai der!

Mahse, Kosovo hian second half-ah goal hnih an rawn khung ve leh - goal hmasa ber khungtu Berisha chuan an goal hnihna a khung a, khel chhe tak Manchester United defender Harry Maguire penalty chawi chu Fenerbahce forward Vedat Muriqi chuan a khung leh bawk. Si phurh erawh an sut zo hman ta chuang lo. 

Three Lions coach Gareth Southgate-a'n khawvela tlarhma ṭha ber pawl a neih thu a sawi a, Kosovo laka an khelh dan en chuan tuman an hnial lo ang. 

Sterling-a'n goal khat a khung piahlamah assist vawi thum a nei a, Manchester City forward hi Kosovo tlarhnungten chelh din dan tur an hre lo a ni ber. Kane-a hriamzia hrilh nawn kan ngai lo a, Sancho rintlakzia hrilhfiahna awlsam ber chu minute 85-naa lakchhuah a nihin fan-ten ding chungin zahna an lantir. 

Mahse, tlarhnung laia Keane leh Maguire inkawp erawh mang ti ang an ni a, hmun sang taka England thlenpui tur chuan Southgate-a'n ngaihtuahna a hman ṭhat a ṭul ang.