Peru lakah Brazil an tlawm

A zawna match 17 chhung zet tlawm loa kal thei Brazil chu Peru lakah 1-0 in an chak lo a, coach Tite naute chak lohna hi friendly match mai mah ni se an record duhawm tak chu thai chhiatsak an ni.

Nimin zing LA Memorial Coliseum, Los Angeles-a inkelah Peru tan defender Luis Abram chuan hun tawp hma minute nga chauh a awm tawh tihah goal awmchhun a khung, world champion vawi nga ni tawhin a chhanletna tur an nei hman lo.

N

ipui laia khelh Copa America-ah khan Brazil hian an ramah Peru hi 3-1 in an hneh. Tun ṭumah hian Copa America-a an chhawr theih loh Neymar a inlan thei tawh, footballer manto ber bakah Vinicius Junior Lucas Paqueta te chuan na takin goal nawr mah se goal an pai tel lo.

Kum 27 mi Neymar hian an match hmasa zawka Colombia nen an inhnehtawk ṭumin goal a khung a, ram tana goal khung hnem lamah Ronaldo (62 Goals) nih rual tur chuan match dang a nghah leh rih a ngai dawn.

Friendly match inkhel dangah Argentina chuan Mexico 4-0 in an sawp thung. Inter Milan striker Lautaro Martinez-a'n minute 22 chhunga hattrick a siam bakah Paris St-Germain midfielder Leandro Paredes chuan goal khat a khung ve bawk.

Argentina hian captain Lionel Messi bakah tlarhma lama player pawimawh leh tawnhriat ngah Sergio Aguero leh Angel di Maria te awm loh lai pawhin goal khung kawngah harsatna an tawk lo hle a ni.