Champions League thlak danglam tum ṭhulh

Europe-a football thuneitu sang ber UEFA leh club inzawmkhawm pawl  European Club Association (ECA) te chuan Champions League thlak danglam tumin thawhhona lo kalpui tawh mah se an beisei angin thil a kal dawn lo. 

Thawhṭanni leh Thawhlehni khan ECA hi Geneva, Switzerland-ah an inhmu khawm a, European football kalpui dan tur hi thusawi langsar zinga mi a ni. 

UEFA chuan Champions League-ah hian group paliah team pariat zel awm turin ruahmanna an siam a, match ṭhenkhat chu kartawpa khelh turin an ti bawk. Hei mai hi a ni lo. Club inlan 32 zinga 24 chu season tharah pawh Champions League khel leh tur an ni ang a, Europa League leh a hnuai chiaha league thar Europa League 1 te nen relegation & promotion kalpui tur a ni ang. 

UEFA ruahmanna hi kum 2024 aṭanga hman ṭan tura tih a ni a, ruahmanna hi ṭha viau angin lang mah se European club lian ten an duh lo - an tualchhung inelna a ti hlu lo zo ang, tih an hlau. 

Tun dinhmunah chuan England, Spain, Italy, Germany leh France chu European club tenau ten an dem ber an ni a, anni ho hian an duh lo viau a nih pawhin a awm lo hran lo. 'Big Five' tia hminglem an pek ram te hian Champions League-ah relegation & promotion kalpui a nih chuan an tualchhung football inelna chu a hlu lo sawt ang tih an hlau. 

Premier League, La Liga, Serie A, Bundesliga leh Ligue 1 club te hian league nomawi piahlamah Champions League khelh phak chu inel nan bera an hman a ni a, hei hi an league chawi nungtu a ni. 

European football-a ram langsar ni lo club-ten sum an hmuh theihna ber tura an beisei chu UEFA hnuaia inelna an khelh a ni a, an tan Champions League kalphung thlak hian awmze thui tak a nei ang. 

Hei mai a ni lo - kalphung thlak a nih chuan Champions League-ah tun aiin sum hmuh tur a tam zawk dawn a, ram tenaua club-te tan chuan an duhna hi awm tak a ni. Mahse, Big Five club-te chuan hetiang hian ruahmanna kalpui ni ta se an tualchhung league-a sum hmuh chu a hniam sawt dawn tih an hria a, an duh lo. 

European club-te sum hmuh hi a inthlau ṭhin hle - season hmasa Scottish champion Celtic sum hmuh belhkhawm chu pound maktaduai 101.6 a tling a, Premier League mawngphah Huddersfield-in television aṭang ringawtin pound maktaduai 96.6 an hmu thung. 

Ruahman hmasa ang chuan nimin khan UEFA, League leh Club aiawhte titi hona ruahman a ni a, mahse club an inlungrual loh avangin hei hi sawn a ni. 

ECA chairman Andrea Agnelli chuan nakkum March-ah an inhmuhkhawm leh tur thu a sawi a, 2022 hmaa engkim tihfel a duh. Juventus chairman ni bawk Agnelli chuan, "Kan vaia lungrualna leh thawh ho theihna tur kan ngaihtuah a ngai. Kum 2022-ah chuan engkim chinfel hman a ngai tawh," a ti. 

Tarlan tawh angin ruahmanna thar hi kum 2024 aṭanga hman ṭan tura tih a ni a, UEFA chuan 2022-ah chuan 2024 atana TV rights a buaipui ṭan tawh dawn a ni.