Asian champion chelhtu India

Beiseina, rinna, dawhtheihna, tumna leh thlan tui luang chhuak te chuan Asian champion hmaah nghet takin India a dintir a, point khat hlu tak an hlawh chhuak. 

Thawhlehni zan khan World Cup qualifier khel turin Qatar-ah India an lenglut a, 0-0 in an inhnehtawk. Oman laka vanduai hlim India an vannei a, lawmin an lam. Jassim Bin Hamad Stadium-a inkhelh ṭan hmain India thiampuipa Sunil Chhetri inlan theih loh tur thu tihchian a ni a, Blue Tigers tan beiseina neih san a har hle. 

Mahse, Chhetri awm loh laiin Gurpreet Singh Sandhu chu India tan 'hero' a ni a, Punjabi goalkeeper pasang hian vawi 27 ngawt shot a hmachhawn chungin goal a chhuah duh lo. 

India coach Igor Stimac-a'n Qatar an hlauh bik loh thu a sawi a, mahse âtthlak taka attacking football khelh erawh a tum chuang lo. 

Croatian coach hian 4-1-4-1 formation hmangin players a rawn rem a, Chhetri la awm loh avangin tawnhriat nei tam lo Manvir Singh chu tlarhmaah maltlattir a ni - beisei san a har. Rowllin Borges chu defensive midfield-ah chhawr a ni a, a hmaah player pali inhnawhkhawmin Qatar attacking na tak chhut chah chu an tum dan a ni. 

Mahse, he Qatar team hi Asian Cup final-a 3-1 a Japan ngamtu kha an ni a, 6-0 a Afghanistan sawp hlim an nih bawk avangin India fans tam zawkin point hmuh an beisei ngam lo. 

Rin lawk ang ngeiin Qatar goal bawh a na a, tharum an ngah a, an che rang a, India aiin ball an thiam zawk bawk - a pawimawh ber erawh goal a ni. 

'The Great Wall of India' tia hminglem an pek Gurpreet chu India tan a ding nghet tlat a, Qatar-in vawi tam shot an nei chungin a tawpa ding GSS an paltlang zo chuang lo. World Cup 2022 thleng tur Qatar-in chance an inneih chhawk a ni ber a, mahse captain Hassan Al Haydos, Abdulaziz Hatem, Boualem Khoukhi, Bassam Al-Rawi leh Almoez Ali  ten an hun ṭha neih an khawhral. 

Tlarhma lama Manvir Singh chu a tikimtu satliah a ni ber a, kum 23 mi striker hian khelmualah minute 90 hun a hman chhungin shot a nei miah lo!

Gurpreet Singh Sandhu chet ṭhatzia kan sawi tawh a, Punjabi keeper kher hi si ban nghaktu ni lo se India hian point an hawn kher lo ang. 

Tlarhnung laia Sandesh Jhingan leh Adil Khan chu fak loh theih loin an khel ṭha a, India defender pahnih hian vawi tam Qatar tlarhma an dang chat. Qatar 'movement' ṭha tur dang chattu ber Anirudh Thapa leh Sahal Abdul Samad-ten inkhel ṭantir lamah boruak zo lo deuh mah se an khel ṭha tulh tulh a, midfield-ah tlin takin an hna an thawk. 

Sahal hian goal khungna remchang a nei hial - a vanneih ṭum erawh a ni lo. Asian champion lakah meuh pawh Udanta Singh 'speed' a lo la ṭha reng a, Manipur tlangval hian hun tawpah a pet goal teuh hle. 

October 15-ah India-in an match thumna an khel leh dawn chauh a, Kolkata khawpuiah team nem zawka ngaih Bangladesh an mikhual ang. 

Afghanistan-in 1-0 a Bangladesh an hneh avangin India hi Group E-ah palina an ni mek a, mahse khualmualah Qatar ber an draw miau avangin third round luhna chance a awm. Oman laka India chak loh dan thlirlet chuan an vanduai tih theih a ni a, India hian khualmualah Oman hneh an tum ngam dawn. 

Mahni mualah Qatar an zuam sawt ang a, Afghanistan leh Bangladesh laka chak lo tur chuan an indah phal bik lo ang.