Mizoramin an hna an zo

Subroto Cup Under 17 mipa inelnaah nimin khan Mizoram chuan International Board Schools Sports Org (IBSO) chu 16-1 in an sawp a, an hmalam hun hi vawiin tlai dar 4:00-a Kerala leh Bangladesh inkhel result-ah a innghat.

Delhi-a inelna neihah hian Mizoram hi SYS Football Academy, Lunglei hmingin an kal a, match hmasa berah Kerala nen goal awm loin an inhnehtawk a, match hnihnaah Bangladesh 13-1 in an sawp leh bawk. Mizoram hian match li aṭangin goal 31 an khung a, goal thum chiah an chhuah avangin goal difference 28 zet an nei a, chutichung chuan an dinhmun a him lo.

Kerala hian nimin vek khan West Bengal 3-0 in an hneh a, anni hian match thum khelhah goal 15 khungin goal thum an chhuah a, an goal difference 12 a ni mek. Kerala hian vawiin tlai dar 2:00 hian Bangladesh an hmachhawn dawn a, goal 16 an khung a, goal an chhuah loh bawk chuan Mizoram nen an intluk chiah dawn.

Mizoram hian Bangladesh hi 13-1 in an hneh tawh a, Kerala hian Bangladesh hi 17-0 a an hneh thei a nih chuan quarterfinal an lut dawn. Bangladesh hi tla tawh an nih avangin Mizoram dinhmun a him lo a, Kerala tan pawh goal 17 khung a awl bik lo ang.