Zaninah Electric Veng Vs Aizawl FC

Mizoram Premier League Season 8-ah champion lai Aizawl FC-in chak hmel an la hmu lo a, kumin I Day Football champion Electric Vengin point thum an la hmu bik lo. Coach tawnhriat nei ṭha Standly Rosario leh Lalsangzuala Hmar-te enkawl team hi zanin dar 7:00 hian Lammualah an inhmachhawn ang.

I Day Football group stage-ah Electric Veng leh Aizawl FC te an inkhel a, goal a lut lo. Tun season-a an intawn hmasak ṭumah hian ruahsur vangin inkhel a mumal thei lo a, chawlh a ṭul reng avangin mipuiin an beisei ang an hmu lo.

Hetichung hian inkhel en tlak tak a ni a, Sanga hoten inrintawkna an neih phah bawk. Team pahnih intawn hma hian Aizawl FC-in MFA Super Cup champion Mizoram Police 5-1 in an hneh a, I League club buk a rit hle. Electric Veng coach Sanga pawhin point khata a lawm tur thu a sawi lawk ang chiahin inkhelh banah pawh an result-a a lungawi thu a sawi.

Tunah erawh boruak a dang ta, Electric Veng hi I Day Football champion a nih avangin Aizawl FC an hlau tawh lo. Sanga chuan, "Point khat chiah kan la hmu a, point khat dangah chuan lungawi a har ang. Point thum hmuh ngei a ṭul," tiin I League club an dahsan tawh bik loh thu a sawi.

AIFF-in Santosh Trophy khelh hun an sawn avangin MPL-ah nghawng lian tak a awm a, a tuartu zinga mi chu Electric Veng an ni. Aizawl FC erawh I League club an nih avangin player an thawh thei lo a, an tuar lo.

Electric Veng hian Mizoram team-ah player paruk an thawh a, chung zinga pathum Jacob Lalrawngbawla, David Lalchhuanawma leh Lalrammawia te chu FC Venghnuai nen an inhnehtawk ṭumin bench-ah an dah. Player dang pathum defender PC Laldinpuia, winger Ramhlunchhunga leh keeper Lalmuansanga ten bul an ṭan a, Aizawl FC nen erawh an ṭhat dan berin an inlan dawn.

Coach Sanga chuan, "Santosh Trophy khelh dawn avangin MPL chawlh a ni dawn a, kan lawm takzet. Chutihrualin chawlh hun chhunga point khat nen chiaha hun hman kan duh lo a, Electric Veng mipui pawhin min puih ṭhat a ṭul a ni" tiin Vanglaini a hrilh a, veng mipui puihna a sawm bawk.

MPL8-a foreigner pahnih nei thei chu Aizawl FC chiah an ni a, Standly Rosario chhawr theih turin Alfred Kemah Jaryan leh Juuko Richard Kassaga te an awm. Chutirhualin an player tam zawk hi kum 25 hnuai lam an ni a, an player-te kum chawhrual hi kum 22 pawh a tling lo.

Aizawl FC coach Standly Rosario chuan, "Rawlthar duhawm tak tak kan nei a, khelhna hun ka pe dawn. Chutihrualin kan match hmasa bera point khat chauh kan hlawhchhuah avangin point thum kan mamawh tih ka hria," tiin chak an tum thu a sawi ve bawk.

I League club hian rawlthar duhawm ṭhahnem tak an nei a, academy aṭanga an sawn chhoh PC Lalhriatpuia, David Lalhlansanga leh Ayush Dev Chhetri te pawh inlan thei dinhmunah an ding. Chutihrualin hmun pawimawh chang tawh Isak Vanlalruatfela leh F. Lalremsanga te pawh kum lam thlir chuan player naupang zinga chhiar theih an ni.