MFA Super Cup final rematch

Vawiin tlai dar 4:00 hian Lammualah Chanmari FC leh Mizoram Police an inhmachhawn dawn a, MPL8 round 1-ah anni pahnih chiah hian hnehna an chan avangin an inkhel tur hi a pawimawh hle.

Police hian MFA Super Cup final-ah Chanmari an hneh a, an chakna erawh penalty shootout a nih avangin inchhuang thei an ni lo. I Day Football-ah group khatah an awm ho a, hun pangngaiah 2-2 in an inhnehtawk. Kumin chhunga vawi hnih an intawn tawhah minute 90 chhunga chak an awm loh avangin an intluk tawk tih a chiang.

Chanmari FC-in H. Vanlalthlanga hnuaia ropuina an chan chhoh khan rawlthar duhawm zet mai Jerry Mawihmingthanga a rawn inlar ṭan a, kum naupang te nichung siin goal pawimawh a khung thei. Chanmari mipui tana hriat reng tlak goal vawi tam tak a khung a, chung zingah chuan 2013 I Day Football semifinal-a Mizoram Police lama a chakna goal khung a tel pha ngei ang.

Chanmari leh Police te hian RG Stadium-ah inkhel hmuhnawm bik an lantir a, hun pangngaiah 1-1 niin extra time-ah pawh goal khat ve ve an khung belh a, inkhel boruak a nung ṭha hle. Player ṭha danglam bikna a rawn lang a, minute 107-naah Jerry hian chakna goal a khung. Chanmari tlangval Jerry hi Mizo club tan chelh reng theih a ni lo a, DSK Shivajians Liverpool Academy-ah lutin ISL club NorthEast United leh Jamshedpur tan khel tawhin season tharah ISL club Odisha FC (Delhi Dynamos) tan a khel ang.

Tun ṭuma Chanmari jersey mawitu zinga mi Lalnunzama hi Laipuitlang rawlthar ni mah se Chanmari FC chhul chhuak a ni a, Jerry ang thoin theihna sang tak a nei. Zama hian Khelo India Under 17-ah Mizoram champion pui tawhin best player a ni a, season liam ta MPL7-ah pawh goal ruk khungin a tir match hmasa pangaah goal a khung vek.

Chanmari forward Zama hian I Day Football-a Mizoram Police an hmachhawn ṭum pawhin goal hnih a khung a, MPL match hmasa bera Ramhlun North an hneh ṭumin ropui takin a pet goal bawk. Zama hian Jerry hnung zuiin Chanmari FC hi MPL nomawi a chawipui thei dawn em tih hi hriat a châkawm hle.

Chanmari FC hian Santosh Trophy khel tur Mizoram team-ah player panga Lalmuankima Hauhnar, MS Dawngliana, Lalnunzama, Lalruatfela leh Vanlalnghenga an thawh thei a, an ṭha tih a chiang. Mizoram Police hian player panga F. Lalmuanawma, Lalhmunmawia, Lalrinzuala Khiangte, R. Malsawmtluanga leh Lalbiakhlua te an thawh ve a, Chanmari nen an inbuk tawk tih a hriat theih.

Chutihrualin tawnhriat ngah zawnga thlir chuan Police hian Mizoram innghahna ni ṭhin F. Lalrinpuia, Malsawmfela leh Lalfakzuala te an la nei. Lalbiaksanga Colney hote hi an inrem fuh a nih phawt chuan champion rinkai an ni a, S. Malsawmtluanga enkawl Chanmari FC hi eng ang chiaha ṭha nge an nih vawiin tlai hian a hriat theih ang.