Chawimawina dawng thei turah Mary Kom

Indian Sports Ministry chuan India khua leh tuite hnena chawimawina hrang hrang dawng thei tura an rawtte hming an tarlang. India rama cilvil mite chawimawina sang pahnihna Padma Vibhushan award dawng turin MC Mary Kom chu an chhawp chhuak.

Chawimawina hrang hrang dawng tur hian infiammi pakua an tarlang a, an vaiin hmeichhia vek an ni - tun hmain hetiang hi a la awm ngai lo. Badminton a khelh thiam avanga khawvel hmelhriat PV Sindhu chu cilvil mite chawimawina sang pathumna Padma Bhushan dawng tura beisei a ni thung.

Award dawng thei tura an beisei te hi Padma awards committee hnena thlen leh tur an ni a, anni hian nakkum Republic Day (January 26) dawn niah award dawng tur hming an puang ang. Indian Sports Ministry lamin a rawtte hi pawm an ni tlangpui a, chutihrualin pawm vek erawh an ni ngai lo.

Manipur boxer, boxing khel tur renga piang MC Mary Kom hi World Amateur Boxing champion vawi ruk a ni tawh a, Indian boxer zingah hetiang ti thei hi an awm lo. World Championships-ah medal pasarih zet a la tawh - hei pawh hi India record a ni tho.

Boxing ring chhungah a hlawhtling hle a, tun hmain chawimawina pawh a lo dawng nual tawh. Kum 2006 khan Padma Shri hlan niin, 2013 khan Padma Bushan hlan a ni bawk. President of India pawhin 2016 April thla khan India rama rorelna in sang zawk Rajya Sabha member atan a lo ruat tawh bawk a ni.

Kum 36 mi Kom hian chawimawina a dawng a nih chuan Indian infiammi zingah he award dawng thei palina a ni ang. Tun hmain chess huanga world champion ni tawh Vishwanathan Anand (2007), cricket legend Sachin Tendulkar (2008) leh mountaineer Sir Edmund Hillary (2008) ten an lo dawng tawh.

PV Sindhu-i'n Indian badminton chanchin a ziak danglam chho mek zel a, thla hmasa mai khan BWF World Championships-ah gold medal a vaw chhuak. Rio Olympic silver medalist hi Indian shuttler zinga world champion ni thei hmasa ber a ni hial.

World number 1 Sindhu hi kum 2015 khan Padma Shri award hlan a lo ni tawh a, 2017 khan Padma Bhushan dawng tura rawt a lo ni tawh bawk. Mahse, hemi kum hian an rawtna hi a tlang lo, a vawi hnih nan an rawt leh tihna a ni.

Hyderabad nula hian season hmasa khan World Tour Finals-ah hlawhtlinna a lo chang tawh bawk. Vanglai hun a hmang chho mek a, India tan sulhnu ropui tak tak a hnutchhiah tawh hi nasa takin a la belhchhah zel a rinawm.

Chawimawina sang palina Padma Shri dawng thei tur hming pasarih a lang bawk a, Mizo ten kan hriat langsar tak tur chu India hockey captain Rani Rampal a ni.

Kum 24 mi Rani hian ram tan match 226 a khelh aṭangin goal 112 zet a khung tawh. Senior team hotu niin, a kaihhruaina hnuaiah Lalremsiami Hmar pawh a khel mek, India tan Mizo nula leh Rani hi tlarhma lama rinrawl an ni.