Basketball World Cup Champion lai United States an tla

2019 FIBA Basketball World Cup chu China-ah khelh mek a ni a, Thawhlehni khan France-in champion lai United States 89-79 in an hneh.

Basketball World Cup hi vawi 18-na niin vawiin hian semifinal khelh a ni dawn. Chawhnu dar 1:30-ah Spain leh  Australia an inkhel ang a, tlai dar 5:30-ah Argentina leh France an inkhel ang. Final hi September 15, Pathiannia khelh tur a ni.

United States hi khawvel ram zinga basketball thiam ber an ni a, France lakah chesual mah se an squad ṭha ber an tir a nih chuan anni aia team ṭha tur an awm chuang lo.

Kum 2006 World Cup final-ah United States hian Pau Gasol-a telna Spain an hneh lo a, hemi hnu hian international match-ah la chak vekin match 58 a zawnin an chak tawh. Hemi chhung hian ram inelna ngaihhlut Olympics-ah 2008, 2012 leh 2016; FIBA World Cup-ah 2010 leh 2014 bakah FIBA AmeriCup-ah 2007 leh 2017 khan an champion.

Kum 2006 hmalam chhiar tel phei chuan Olympic vawi 18 an telah medal an la vek a, vawi 15-ah hian gold medal lain FIBA World Ranking-ah pawh pakhatna an ni mek.

August 31 aṭanga ṭan Basketball World Cup-ah United States hi first round-ah Czech Republic (88-67), Turkey (93–92 (OT)) leh Japan (98–45) te nen group E-ah awmin an khingpui an hneh vek.

Second round-ah United States hi first round-a an awmpui Czech Republic bakah Greece (69–53) leh Brazil (89–73) te nen group K-ah awmin harsatna an tawk lo. Quarterfinal-ah United States hian group L pahnihna France an hmachhawn a, harsa tura ngaih a ni lo.

Amaherawhchu US leh France te an in khel tawk a, fourth quarter-a che ṭha France-in hnehna an chang. Les Bleus tan hian NBA club Orlando Magic tana khel Evan Fournier-a'n point 22 a nei a, US an hneh theih nan a pawimawh hle. United States tan Utah Jazz guard Donovan Mitchell (29 pts, 6 rebs, 4 asts) che ṭha mah se 79-89 in an chak lo.

Semifinal inkhel dangah Argentina-in Serbia chu 97-87 in an hneh a, Spain-in 90-78 in Poland an hneh a, Australia-in Czech Republic (82-70) an hneh ve bawk.

Ram inelna lian tham hnuhnung ber chu Olympic 2016 kha a ni a; Serbia, United States, Australia leh Spain ten semifinal an lut. Kumin World Cup-ah erawh Olympic hnuhnung ber semifinal-a chak lo pahnih Australia leh Spain te chiah a sang pali zingah an tel a, anni pahnih hi an intum dawn.

World Cup-ah hian khawmualpui pali aṭangin ram 32 an tel a, team tin hian position an neih theih nan champion beiseina an neih loh hnuah inelna an nei chhunzawm. Semifinal thleng zo ta lo Serbia, United States, Poland leh Czech Republic ten pangana aṭanga pariatna tur nizan khan an zawng chhunzawm a ni.