Police-in Chanmari an hneh

Mizoram Premier League Season 8-ah Mizoram Police chiah chak vek thei an awm ta. Nimin tlai khan round hmasa bera chak pahnih inkhelah Police-in Chanmari 3-2 in an hneh.

Chanmari tan man of the match-a thlan David Lalrinmuana'n goal ropui pahnih khung mah se, Police tan Lalbiakhlua (Hlutea), Malsawmfela leh Lalbiaknunga ten an chhanglet a, Lalbiaksanga Colney hoten point thum hlu tak an hlawh chhuak.

Nimin tlai inkhel hi goal aṭanga teh tur pawh ni lo se inkhel hmuhnawm a tling. Minute ngana lekah David-a'n box pawn aṭangin kawh zetin a pet goal. Police chhan letna pawh goal mawi tho a ni - minute 34-naah F. Lalrinpuia (Valpuia) vawrhluh chu leia a tlak hmain Hlutea'n mawi zetin goal kilah tak a khung.

Police hi bench aṭanga Sawmfela luh hnuah an che ṭha lehzual a, Ramhlun South tlangval hian Chanmari keeper Zothanmawia tihsual nang chingin minute 48-naah a khung. Ngaih ṭha taka Police an awm laiin David-a'n freekick aṭangin mawi zetin a khung a, Zemabawk North tlangvalin a thiam a la theihnghilh lo.

A la tawp lo deuh a, hun tawp dawnah tawnhriat ngah zawk Police tan Manunga'n chakna goal a khung.Minute 89-naah Manunga hian kawh zetin box pawn aṭangin a khung a, kum 36 mi Hlimen tlangval hi tun MPL-a player upa ber a ni.

Zanin inkhelh zawhah Santosh Trophy avangin MPL chawlh rih a ni dawn a, round 3 hi October 3-ah khelh ṭan leh chauh tur a ni ang.