Chhinga Veng nge lian Venghnuai?

Chhinga Veng hi MPL8-ah hian season hnuhnung pahnih aiin an buk a rit lo deuh zawk niin a lang a, zanin dar 7:00-a an khingpui FC Venghnuai hi kai thar ni chungin an thawm a ring hle. Zanin hian Lammualah tu nge buk rit zawk fiahin a awm dawn a, en a châkawm takzet.

Chhinga Veng hi Lalremruata leh Anand Gurung ten an enkawl a, an match hmasa berah Aizawl FC hmachhawnin point khat chauh hlawh chhuak mah se I League club hi si phurh suttu zawk an ni. Coach Anand Gurung chuan, "FC Venghnuai hi an phur a, an ṭha khawp mai. Chutih rualin Santosh Trophy vanga hun rei tak kan awl dawn avangin chawlh nawm nan pawh chak a ngai. Kan foreigner pawhin bul a ṭan ang," tiin Vanglaini a hrilh.

Chhingcows hian champion an la duh reng tih nemngheh nan Quattara Sie an lalut a, Ivorian forward hi Aizawl FC nen hun rei lote chuah inlan mah se training-na aṭanga thlirin foreigner ball thiam ve tak leh killer pass nei thei a ni.

FC Venghnuai lamin I Day Football final-a an hneh loh Electric Veng an chelh thei a, an khelh tawh chin aṭang chuan semifinal beisei ngam tur an ni.

Chutihrualin MPL8 semifinal bawm hi a tawt riau - squad neih dan aṭanga thlir chuan Mizoram Police, Chanmari FC, Electric Veng FC leh Chhinga Veng te hi an khan viau. MPL kaithar FC Venghnuai hian knockout stage luh an duh a nih chuan I Day Football-a an hneh loh Chhingcows lakah point hloh a thiang lo.

Venghnuai defender pawimawh Lalmuanawma (Munez) chu Electric Veng nen an inhnehtawk ṭumin hnawhchhuah a ni a, zanin hian MPL kaithar hian Munez tel loin an khelh a ngai dawn - fans neih ṭhat a pawimawh zual ang.