Tlai dar 4:00-ah Chawnpui Vs Ramhlun North

Mizoram Premier League Season 8-ah vawiin tlai dar 4:00 hian Chawnpui FC leh Ramhlun North FC te Lammualah an inkhel dawn a, team pahnih hi match hmasa bera an chak loh ve ve avangin inkhel pawimawh a ni ang.

MPL8 aṭangin AIFF Centralised Registration System (CRS) hman ṭan a ni a, Chawnpui leh Ramhlun North te hian CRS vangin harsatna an tawk - match hmasa berah an ṭhat dan ber angin an inlan thei lo.

Chawnpui hian Mizoram Police 2-1 in an hneh lo a, hemi ṭum hian CRS vangin an player pawimawh defender Lalthlamuana bakah attacking player pathum Jerry F. Zonunsanga, Lalnunmawia leh Lalthanmawia Renthei (Amawia) te an chhawr thei lo.

Manager K. Zohmangaiha chuan, "Amawia hi a la fel thei dawn lo a, kan player pawimawh kan la chhawr thei lo tur hi a pawi ka ti. Chutih rualin midang hi chu a fel hman turah ka ngai a, ṭha zawkin kan inlan thei ang," tiin Vanglaini a hrilh.

Ramhlun North pawhin Chanmari FC 3-1 a an hneh loh ṭumin chhawr theih loh zingah starting eleven-a lang thei tur R.Vanlalruatpuia, Lalramchhuana, Vanlalfela leh Kaleba Lalnunhlima te an tel. Coach Jonathan C. Lalrintluanga (Thantea) chuan, "Keini hi chuan CRS kan tuar a ni. AIFF lam an che muang deuh a, tihdik loh kan nei a nih pawhin rawn sawi hma se kan buaipui leh vat thei tur a ni a, a tlai hnuah an rawn thawn let chauh," tiin point an hmuh loh chhanah CRS-in mawh a phur len thu a sawi.

CRS vangin team pahnih hian buaina nei mah se an harsatna vangin khelmualah hriatthiam an ni lo a, inkhel pawimawh dan a ngai reng. Chawnpui leh Ramhlun North te hi team intluk tawk an nih avangin an pahnih inkara point hlawhchhuah hi a pawimawh dawn.

An squad neih dan thlir chuan table mawng lama awm tura ngaih an ni mai thei a; amahreawhchu an match hmasa bera kim lo chunga champion rinkai an chai tawk ve ve avangin match hnih khat leka ngaihdan siam a rem lo.

Thantea enkawl Ramhlun North leh coach HC Zarzoliana enkawl Chawnpui te hian MPL7 barakhaihtu Electric Veng FC hnu chhui an tum ang.