Arsenal mikhual tur Chelsea

Krismas lai a ni. Premier League champ-ion tum Arsenal leh Chelsea te chuan point 37 ve ve hmuin an inel tawk hle a, goal difference nei ṭha zawk Blues chu a chung zawkah an awm - Tunah erawh Gunners hian point ruk zetin an elpui hi an phak lo.

Zanin dar 11:00 hian Emirates Stadium-ah Unai Emery naute chuan Maurizio Sarri enkawl Chelsea an mikhual dawn. London derby-a inhmachhawn turte hi season thara Champions League khelh tuma inel mek an ni a, point thum an mamawhna a sang hle.

Nikum August thla laihawl khan Stamford Bridge-ah Sarri naute hian 3-2 in hnehna an chang tawh. Manager pahnihte English football-a an intawnna hmasa berah Italian manager a hlawhtling zawk - Spanish manager hian phuba a la thei dawn em tih chu zaninah fiahin a awm dawn.

Arsene Wenger a chhuah hnuah Emery a rawn luh khan Arsenal ṭantuten beiseina an nei thar a, tunah erawh champion sawi ngam tur dinhmunah an ding leh tawh lo a, team chhung boruak sawi neuh neuh tur a awm mek bawk.

Spanish manager Emery-a'n a player hlawh hnem ber Mesut Ozil a chhawr mumal lo a, "Mesut hian kan match hnuhnung ber a khel lo a, a inpeih a nih chuan Blues a hmachhawn ang. Chawlhkar hnih chhung ṭha takin a training tawh, a mamawh chu ngelnghet taka khelh ṭhat a ni," a ti.

Germany international hlui Ozil-a'n Arsenal tana match a khelh pumhlum hnuhnung ber chu December 12 daih tawh kha a ni, an player ṭha bera ngaih hi manager nen an boruak a ṭha tawk lo tih a rin theih. West Ham an hneh loh ṭuma player khelh dan thlir chuan Arsenal hian khelmual chhunga kaihruaitu ṭha an mamawh.

Kum 47 mi Emery chuan, "Kan tum hmasak ber tur chu hnehna chan a ni. Khualmuala kan khelh leh kan muala kan khelh ṭhat inkar inthlau lutuk lai hi siam rem ngai lai chu a ni a, tun ṭumah hian fans puihna hmangin game ṭha leh hmuhnawm kan khelh chhuah theih ka beisei.

"A sang pali zinga tel kan tum a nih chuan kan tan Chelsea hi faihna a ni dawn a, West Ham hneh lo hlim kan nih avangin kan ṭan zual erawh a ngai ang. League match 38 zinga a ṭhenkhat hi final anga pawimawh a ni a, tun ṭuma mi hi final tenau a ni ang," tiin a sawi.

Maurizio Sarri -a'n Chelsea a enkawl tirh khan insiamrem nan thla thum emaw tal a mamawh thu a sawi a, fans lam beisei aia ṭhain season bul an ṭan lawi si. Match 18 chhung tlawm loin an kaltluang hman. Mahse, Italian manager hian a sawi sual lo, hmahruaitu Liverpool leh Chelsea te bakah Tottenham te hnuaiah an awm a, nomawi beisei ngam tur an ni lo.

Roman Abramovich-a'n thuneihna a chan hnuah Chelsea hian hlawhtlinna tam tak chang tawh mah se manager an nei nghet thei lo. Season hnih chhunga EPL leh FA Cup chawi thei Antonio Conte pawh an ban. Sarri hian UCL pawh khel phak loa season a khar a nih chuan club thuneitu lam an lungawi a rinawm loh, a sang pali zinga tel turin an hmelma Arsenal hneh a pawimawh.

Napoli manager hlui hian striker Alvaro Morata leh Olivier Giroud te nei mah se a ring zo lo. Juventus aṭangin Gonzalo Higuain la lut turin thawm a nei mek, zaninah pawh striker pahnih ai hian tlarhma laiah Eden Hazard a dah lehin a rinawm.

"Minute 75 chhung inkhel hmuhnawm kan lantir a, a dang minute 15 erawh zial zuk san daih a châkawm," tiin kum 60 Sarri-a'n Arsenal nen an intawn hmasak ṭumin a sawi a, zaninah chuan minute 90 chhung khelh ṭhat an tum ang.

Club pahnihte tun hma lama an intawn tawhna thlir let chuan vawi 76 chak Arsenal hi record nei ṭha zawk an ni a, Chelsea hian ṭum 63 hnehna an chang tawh thung. Blues tan record hi buaina tur a ni lo ang, 2010 hnu lam bikah chuan hnehna chang tam zawk (11 wins) an ni.