Mizo boxer-in silver 2 la
Khelo India Youth Games 2019-ah nimin khan boxer pahnih Zorammuana (Valtea) (48kg) leh Laldinsanga (50 Kg) te chuan final-ah inelna thlengtu Maharashtra boxer ve ve hneh loin silver medal an la. Lalthuthlungdiki (52 Kg) chuan bronze medal a la tawh bawk.
Tuipui rawlthar Valtea hian final thleng tur hian Madhya Pradesh boxer Anan Yadav (5-0), Himachal Pradesh boxer Abhinav Katoch (3-2 ) leh Haryana boxer Kabir Pandit (5-0) te hneh mah se, 48 kg final-ah erawh Bishwamitra Chongtham lakah 5-0 in an chak lo.
Kapzathanga leh Hmangaihthangi te fapa Valtea hian Khelo India-a silver medal a lak hma hian nikum November thla khan National School Games, Guwahati-a neihah silver medal a la tawh bawk a ni.
Mizo final luhna tho 50 kg khelh chhunzawm nghal a ni a, Laldinsanga pawh Maharashtra boxer Aman Yadav chu 5-0 thoin a hneh lo.
Lunglei Ramthar rawlthar Dina hian final thleng tur hian Himachal Pradesh boxer Virender Singh (5-0), Uttar Pradesh boxer Javed (3-2) leh Haryana boxer Naveen Siwach te a hneh a ni.
Vanhnuna leh Lalsiamliani-te fapa Dinsanga hian nikum khan All India Inter SAI, Rohtak-ah silver medal a dawng tawh bawk. Mizoram tana silver medal dawngtu Valtea leh Dina bakah Lalnunzira te chu India camp-a awm turin koh an ni.
Mizoram hian Khelo India-ah boxer pariat a tir a, SYS coach pahnih Vulṭhavunga (coach) leh Lalbiaksangi (manager) ten an enkawl a, silver medal pahnih leh bronze medal pakhat an la.
Coach Vula chuan, "Unanimous ve vein chak lo mah ila gold medal erawh kan hnaih viau. Dina te inhnek lai hian round hnuhnung berah minute khat an khelh tawh hnuin light a rawn thim a, hemi hma hian a khingpui hian warning a hmu hman a, minute khat dang hi khel zo se chuan result a dang thei mahna. Engpawh chu ni se kan naute khelh danah a lungawi thlak hle," tiin Vanglaini a hrilh.
Mizoram hian gold medal pathum, silver leh bronze medal pali ve ve lain medal 11 a la ta chiah a ni. Nikum khan Mizoram hian Khelo India-ah medal pathum lain gold, silver leh bronze medal pakhat ṭheuh a la a ni.