Levante lakah Barca an inhrosa

Copa del Rey quarterfinal-ah Barcelona an lut a, Ningani zan khan last 16 first leg-a 1-2 a an ngam loh hnu Levante chu 3-0 in an sawp - inkhel pahnih belh­khawmah 4-2 in hnehna an chang. 

Barcelona tan Ousmane Dem­­­bele chuan goal hnih a khung a, Lionel Messi chuan goal khat a khung bawk - Ar­gen­tine forward hian a match hnuhnung pangaah goal sarih a khungna a ni. 

La Liga club lian dang zingah Real Madrid chu a thiam pariat zingah hian an invawrhkai chiang tawh bawk a, Atletico Madrid erawh Girona lakah mualphoin Copa del Rey an beisei thei tawh lo. 

Barcelona tan Dembele chuan goal hnih khung mah se a goal khung hi a vanneih vang tia sawi theih ve ve a ni a, thiam vang ai mahin vanneih 'goal' a ni. 

Dembele hian minute 30-na­ah a goal hmasa zawk hi a khung a, French forward hian Levante penalty area-ah ball lalutin defender Erick Cabaco chuan chhuhsak a tumna lamah Dembele a tlawh per a, goal-ah a lut daih. 

Minute khat a liam hman chauh a, Dembele bawk a vannei nawn. Kum 21 mi forward hian ṭha zeta ball a lakluh hnuah  Levante goalkeeper Aitor Fernandez a 'chip' khum a, Fernandez hian a kein tawk fuh hram lo se chuan defender tan petchhuah hman tur a ni - mahse a tawk fuh miau a, goal-ah a lut. 

Season hmasaa hliam vanga talbuai Dembele hian season hman zawh takah khan match 23 khelin goal li chiah a khung a, tun season-ah erawh match 26 khelin goal 12 a khung der tawh. 

Lionel Messi-a'n goal khung mah se goal hmaah ṭum dang angin a vannei tawk loah a ngaih theih a, ṭum dang ang chu ni se Argentine forward hi hattrick siam hial thei dinhmunah a ding. 

Kum 31 mi forward hian inkhel ṭantir lamah freekick ṭha zet pet mah se Levante keeper Fernandez  chuan ṭha takin a dan sak a, goalkeeper chauh hmachhawn chungin vawi thum vel chu hun ṭha a nei bawk. 

Minute 54-naah erawh Messi dan reng theih a ni lo - Nelson Semedo siamsak chu ṭha taka a tlanluhpui hnu­ah goalkeeper dan rual loin hahdam takin a pet goal a, Barca an chak chiang.

Messi hian tun season-ah ringawt goal 24 a khung tling leh der tawh a, heti zat goal khung tur hian match 23 chiah a mamawh - league bikah match 17 khelin goal 17 a khung tawh bawk.

Khelmual result aṭanga teh tur a nih chuan Barcelona-in quarterfinal an lut chiang tawh a, mahse Levante-in Barca hi dik lo taka player hmangah puhin Spanish Football Federation lamah an zualko tur thu an sawi. 

Barcelona hian defender Juan Brandariz chu first leg-a Levante nen an inkhelh ṭumin an chhawr a, 'Chumi' tia hriatlar rawlthar duhawm hi second division lamah Barca reserve team tana khelin a league match hnuhnung berah a yellow card pangana a hmu a, hei vang hian Barca hian an chhawr thei lo. 

Kum 2015 khan Real Madrid chu player chhawr theih loh Denis Cheryshev an chhawr avangin Copa del Rey aṭang hian hnawhchhuah an lo ni tawh a, Barca chungah a thleng ve lo ang tih a sawi theih lo.

Barcelona coach Er­nesto Valverde chuan, "Chumi kha hrem a ni tih kan hre ngei a, mahse Cup-ah niloin league-ah zawk chhawr thei lo tur kan ni," tiin nikumah dan thlak danglam a nih tawh thu a sawi a, tihsual an nei loah a inngai.

Zanin La Liga-ah Real Ma­drid an inlan dawn a, tun season-a beisei phak lo tak club hian dar 8:45-ah Sevilla an mikhual ang - zanin hi table-a hma­sawn theihna remchang a ni. 

Real hi table-ah palina ni mekin an chunga awm Sevilla nen an point hmuh zat a in ang a, hmahruaitu Barcelona chu point sawmin an phak lo mek. 

Zaninah hnehna an chan chuan Sevilla lehpelin pathumna an ni ang a, season thara Champions League khel turin an dinhmun a ṭha sawt ang. 

Atletico Madrid chuan dar 11:00-ah Huesca an lenchilh dawn a, hnehna an chan chuan match khata khel tamin Barca chu point hnihin an hnaih sawt dawn tihna a ni a, Pathianni zan dar 1:15-a Leganes mikhual tur Catalan club tan 'pressure' an siam thei ang.