Messi hun a liam tawh em ni?

Barcelona chuan zanin dar 12:30 hian Valencia an mikhual dawn a, an thiampuipa Lionel Messi tel loin an inlan a ngai dawn. 

Spanish chanchinbu lar AS chuan Messi hliam a la dam lo niin an tarlang a, Argentine forward hliam chu a tira an rin dan aia a serious thu an sawi. Messi hian tun season-ah ball a la pet lo a, Thawhlehni zana Champions League first leg khel tura Borussia Dortmund an hmachhawn hunah pawh a inlan theih a la rinawm chuang lo. 

Kum 32 mi a ni ve tawh a, beisei aia rei hliam vanga chawlh a ngai ve ṭan ta a, Barcelona-a Messi hun a liam ve ta em ni? tiih zawhna a awm ṭan ta. 

Thil ṭha ber pawhin tawp hun an nei a, khawvelah kan awm miau avangin kumhlun tur engmah a awm lo. Hmuhnawm taka football mawina pho chhuak ṭhintu Messi chanchin pawh 'hmanlai' tia kan sawi hun a la thleng dawn. 

Spanish football expert Guillem Balague chuan, "Kum 32 a ni tawh a, a vawi khat nan Messi lam hnai ten Barcelona-a a hun tawp a hnaih thu an sawi ri ka hria a ni. "Messi hi Barca-ah kum hnih bak cham tawh lo tur angin an sawi a, 'kum hnih chauh maw?' tiin mak ka ti a, sawifiah dan ka thiam lo," a ti. 

Balague thusawi dan aṭanga a lan danin Messi hian a lam hnaite hnenah chuan Nou Camp-a a cham rei tawh loh tur thu a sawi ngei niin a lang a, a tel loa Barca result chu hrilh nawn ngai loin kan hria. 

Footballer ropui ni turin Messi hian thil tih pakhat a nei ṭhin - season tawp apiangin a fitness zirchianna a nei ṭhin a, a taksa chuan eng ang chiah nge a zawh tawk tih a zir ṭhin. 

Barca legend hi 2021-ah a contract a zo dawn a, a lam hnaite hian contract a pawhsei an ring lo. Messi hian World Cup 2022 khelh ngei a la tum bawk si a, a taksa dinhmun zirchian a duh. Chumi awmzia chu World Cup 2022 khelh hmaa league hahdam zawk khelh a duh tihna a ni a, club level-a nomawi chawi theih zawng zawng chawi tawh forward hian international-a hlawhtling tur chuan eng pawh hlan a huam ang. 

Kum 32 mi a nih tawh miau avangin ṭum dang zawng aiin a taksa a dim lehzual a ngai a, tun season-a a rawn let lawk loh chhanah pawh a chhiar theih ang. 

Lionel Messi hian amah siam liantu Barcelona hi a hmangaih ang tih chu thil chiang a ni a, a aiawh tura Neymar a duh thu an sawi fo pawh hi thil awm lo a ni ta lo. 

Messi hian tun hnaiah Neymar chungchang sawi chhuakin, "Neymar hi khawvela player ṭha ber pawl a ni a, kawl thei ngat ila chu kan tum ram tam takah min thlen thei ang," a ti. Mahse, Messi chuan Neymar lalut tura club thuneitute nawr anga an sawina chu phain, "Kan ngaihdan chu kan thawh ve ngei a, mahse lalut ngei tur erawhin kan nawr lo," tiin a sawi.

Neymar hian Barcelona tana a khelh chhungin match 186-ah goal 105 a khungsak a, PSG a pan hnuah pawh a hna ngai thawh chhunzawmin match 58-ah goal 51 a khungsak tawh. 

Barcelona-a Lionel Messi record en ila, khum leh theih ang pawhin a lang lo - match 687-ah goal 603 a khungsak tawh a, season hmasaah pawh match 50-ah goal 51 a la khung. 

La Liga nomawi a chawi tawh ringawt pawh 10 a tling a, player tam zawkin vawi khat tal Champions League nomawi chawi ve an duh laiin vawi li a champion tawh. Ballon d'Or vawi nga dawng tawh Messi tel loin tun season-ah Barca hian league match thum an khel tawh a, point li chiah an la nei!

Catalan club ṭantuten Messi an ngai em em ang tih a chiang a, chhuak tur anga sawi ringawt pawh an tan chuan muttui lohna tham a ni ang. 

Kum 2001-a Barcelona zawmtu Messi hian thu leng vel karah Barca-a cham zel a tum thu erawh a sawi lang a, mahse a 'taksa dinhmun' erawh a thlir tel tur thu a sawi. 

Messi chuan, "He hmunah hian ka theihna sang bera ka khelh theih thlenga cham ka duh a, ka taksain a tlin tawk thleng khelh ka tum a ni. "He hmun hi ka in a ni a, nomawi chawi duha hnehna kan chan zel chhung chu ka chhuak lo ang," a ti a, thu lengvak a chhanglet. 

Mahse, sawi tawh angin Messi hian contract thar a ziah ngei tur thu a sawi lo a, 'ka taksain a tlin thleng' tiin a sawi - eng chen tak tlin ang maw?