Hong Kong Open khelh hun an sawn

Hong Kong Tennis Association chuan October 5 aṭanga khelh tur WTA Hong Kong Tennis Open chu a huna an khelh theih loh tur thu an sawi a, inelna neih ṭan hun tur hi puan chian a la ni lo.

Hong Kong-ah tualchhung buaina a awm mek a, hmun hrang hrangah buaina chhuak a awm fo bakah awm belh thei a nih avangin he thutlukna hi siam a ni. Inelna neihna hmun Victoria Park hi mipui lungawi lo punkhawm ṭhinna hmun pakhat a ni.

Inelna buatsaihtu lam chuan thuchhuah siamin, "Tun lai boruak thlirin, Hong Kong Tennis Association leh WTA lam chuan inelna hi a hun taka neih theih kan ring lo a, sawn hlat a ni. Tournament-in an kaihhnawih mi pawimawh tak tak nen pawh inbiakna neih a ni bawk a, kan ṭhat tlanna tur a nih zawk kan beisei," an ti.

Asia rama tennis inelna ngaihhlut pakhat Hong Kong Open-ah hian Venus Williams, Angelique Kerber leh Caroline Wozniacki te chu tel tur an ni a, a hun an sawn takah chuan inelna dang nen a insum buai thei dawn em tih pawh hriat a la ni rih lo a ni.