Osaka leh a coach inṭhen leh tawh

Naomi Osaka a khel fuh hleithei lo a, tun hnai a result ṭha lo vangin a coach Jermaine Jenkins nen an inṭhen. Season kal laiah coach pahnih nen an inṭhenna a ni a, midang nen an thawkdun nghal dawn em tih erawh sawi a la awm lo a ni.

January thlaa khelh zawh tak Australian Open hnuah a coach Sascha Bajin nen an inṭhen a, Grand Slam hnuhnung ber US Open-ah a nomawi a hum thei lo bawk - boruak thar tem duhin a coach Jenkins nen hian an inṭhen.

Kum 21 mi Osaka chuan, "A hnen aṭangin thil tam tak ka zir chhuak, ka tan chuan kan thawhdun hun chhung kha a hluin hriatreng tawh tur a ni. Amaherawhchu, ka tan tun hi thil danglam tawn hun tur a ni," tiin coach nen an inkar a tawp thu a sawi.

Flushing Meadows-ah khan Osaka hi world number 1 ni chungin a inlan a, a khup hliam vanga a buaina chu thu hran ni se, nidanga a khel a phak lo hle. Seeded pakhatna kha Belinda Bencic hneh loin fouth round-ah a tla.

Tunah chuan September 16-22 chhunga khelh tur Pan Pacific Open atan inbuatsaihna a nei chhunzawm ang. Season hmasa lama final a luh tawhnaah hian Kiki Bertens, Sloane Stephens leh Angelique Kerber te pawh an inlan ang.