Neymar a inlan dawn em? Icardi engtin nge?

International break laiin Brazil tan Neymar a inlan a, hlawh petu Paris St-Germain tan erawh tun season-ah a la inlan lo. 

Brazilian forward hian zanin dar 9:00-ah inlanna hun remchang a nei dawn a, an mikhual Strasbourg laka a luh leh luh loh chu PSG boss Thomas Tuchel thutlukna a ni ang. French football expert Julien Laurens chuan, "Neymar hi Strasbourg laka inlan turin club chuan an duh," a ti a, fans lamin an lo dawnsawn dan turin ngaihven a hlawh hle. 

Hetihlai hian chanchin ngah tak Mauro Icardi chuan nipui transfer-ah PSG hi a pan bawk a, Argentine striker inlan dawn leh dawn loh hi thil hriat châkawm zingah a tel. 

Nipui transfer laiin Barcelona leh Neymar chu nasa taka sawi zawm an ni a, Messi chuan, "Neymar khan kan hnena lo kir kha a duh takzet a ni," tiin tun hnaiah a sawi chhuak. 

Messi thusawi phatna tur a awm lo. Neymar ngeiin chhuah a duh thu club hnenah a lo sawi tawh a, ama pawisa hial pek a inhuam! Fan-te laka tlatlum lo sa Neymar hi fan-ten an ngaina thar thut lo ang tih a chiang a, August khan fan-te chuan, "Kal ta che, Neymar," tiin stadium-ah banner an lo tar tawh. 

Mahse, Neymar hian kum khatah pound maktaduai 40.7 a hlawh mek a, heti zat hlawh player hi bench-a dah reng chi a ni lo - zaninah a hmel hmuh beisei a sual lo ang. 

PSG-in Inter Milan aṭanga Icardi an lakluh khan media tam takin French club hi fiamthu thawh nan an hmang a, "Paris khawpuiah ennawm an chhuah dawn," tiin an sawi hial. Icardi hian player a nihna ang chuan theihna sang tak nei mah se a nupui leh a agent ni bawk Wanda Nara hi hmeichhe kam tam ve tak a ni a, Inter-ah pawh chanchin a ngah hle. 

Inter-ah coach rorum leh mahni thu duh ve tak Antonio Conte a lut a, Icardi hma hun a thim nghal. Argentine forward hian Inter-ah hma hun a la neih thu Conte hnenah sawi a duh a, Chelsea boss hlui hian a thutlukna erawh a sawh sawn duh lo. 

Kum 26 mi Icardi hian season hmasa pawh khan Inter tan goal 17 a la khung a, inelna hrang hrangah match 219 khelhsak tawhin goal 124 a khung. 

Inter-in hun thim ber an tawn lai pawhin an captain a ni a, Champions League an khel phak lo reng chungin a chhuahsan duh lo a, 'team ṭha' tia sawi an nih loh lai pawhin a hawisan lo. Icardi hian tun aia ṭha zawka enkawl a phuin a inhria a, mahse club lam chuan season hmasaa a nupuiin television hmaa coaching leh player thlenga a lo sawisel ve vak kha an ngai thei lo. 

Italian football expert James Horncastle chuan, "Conte chuan khatiang thil kha a thlen nawn a duh lo. Player chu eng anga ṭha leh thiam pawh ni se, a duh loh chuan a duh lo a ni mai," a ti a, Conte rilru thlak theih a ni lo. 

Icardi nupui Wanda hian, "Ka tan chuan duhthlan tur chhe ber a ni," tiin a pasalin PSG-a pan chungchang a sawi a, Wanda hian Milan khawpuiah TV lamah hna a thawh avangin a pasal hi a kaltir mai a ngai. 

Hetiang taka nupui chanchin ngah, football khawvelin a ngai theih loh neitu Icardi-a'n PSG a pan a, eng boruak nge a ken tel ang, tih chu mipuiin an thlir. Hei mai a ni lo. Chhuah inpeih reng Neymar a la awm bawk a, star player rual, mahni tawka indahsang rual ṭhah, chanchin ngah si an awm dawn. 

PSG boss Tuchel hian hei zawng zawng hi engtin nge a enkawl ang a, engtin nge a kaihhruai ang? Hunin a hril ang.