Liverpool leh City - Thawnthu a danglam lo

Season hmasa Premier League-a in um ber chu Manchester City leh Liverpool an ni a, match li chauh khelh la ni mah se tun season-ah thawnthu a danglam tam dawn lo niin a lang. 

Liverpool leh Manchester City hi la tlawm lo awmchhun an ni a, table chung bera awm chu Reds an ni. Jurgen Klopp naute hian an khingpui an la hneh vek. Manchester City la tlawm lo mah se draw result vawi khat an nei tawh a, Liverpool hnuai chiahah an awm. Zaninah team pahnih an inlan dawn a, result mak a thleng a nih loh chuan chak tura ngaih an ni. 

Liverpool hian vawiin tlai dar 5:00-ah Newcastle United an mikhual ang a, City hian dar 10:00-ah Norwich City an lenchilh dawn thung. 

Newcastle United hi tun dinhmunah chuan team hriatthiam har tak an ni. Match hmasa berah Norwich City (3-1) lakah an mualpho nghal a, Watford (1-1) an inhnehtawkpui a, Tottenham Hotspur (1-0) an hneh lawi si!

Magpies coach Steve Bruce chuan, "Tlarhmaa an ṭhatzia ka hai lo. Kan tlarhnung kan ven uluk ve deuh a ngai tihna a ni mai. Hetiang ang game hautak khelh chak hian a ni Premier League kan khelh," a ti a, Anfield-a lenluh a chak tawh. 

Newcastle tan tun season-a la inlan vek Sean Longstaff chu hliam vangin a inlan thei dawn lo a, Florian Lejeune, DeAndre Yedlin, Allan Saint-Maximin, Matt Ritchie, Dwight Gayle leh Andy Carroll te nen Liverpool an hmachhawn thei lo ang. 

Liverpool boss Jurgen Klopp chuan August thla atana Premier League manager of the month chawimawina a dawng a, hei hian Liverpool dinhmun a hrilhfiah. 

Reds hian UEFA Super Cup an nei fel der tawh a, league match li an chak a, goal 12 an khung a, an lamah goal thum chiah a la lut thung. Roberto Firmino, Mohamed Salah leh Sadio Mane te an thiam ngaiin an la thiam reng a, Magpies tan hmachhawn an châkawm lo. 

Liverpool hian an goalkeeper Alisson chu hliam vangin an la chhawr thei lo mek a, mahse Reds an ti mai mai lo - a aiawhtu Adrian chu extra training session an neihpui!

City thiamzia hrilhfiahna awlsam ber chu an bench lam en hi a ni. Kevin De Buryne, Raheem Sterling, Sergio Aguero leh David Silva te bul ṭantua an awm laia Bernardo Silva, Gabriel Jesus leh Riyad Mahrez-te bench-a an la awm chuan an ṭha tih a chiang. 

Pep Guardiola naute hian West Ham (5-0) a an sawp hnuah Tottenham Hotspur (2-2) inhnehtawkpui mah se Bournemouth (3-1) leh Brighton (4-0) lakah goal khung an harsat lo tih an lantir leh tawh a, Norwich tan a harsa dawn. 

Hriat tel atana ṭha erawh Norwich hian Teemu Pukki an nei ve tho tih hi a ni. August Premier League player of the month-a thlan striker hian match liah goal nga a khung tawh a, City lakah inthlahrun a tum lo ang.