Goal 3 khungin Ramhlun N an chak

Nimin tlai khan Ramhlun North FC chuan MPL8-ah chak hmel hmu turin Chawnpui FC chu 3-0 in an hneh a; hnehna an chan theih nan captain Jessy Vanlalmuana a che ṭha hle.

Ramhlun North captain Jessy hian minute lina lekah goal hmahruai a khung a, Lunglei tlangval hian minute 12-naa Kaleba Lalnunhlima'n goal a khung theih nan ṭha takin a lalut bawk. 

Jonathan C. Lalrintluanga (Thantea) hoten second half-ah goal an khung belh leh a, minute 88-naah Lalthankhuma'n corner aṭanga a ball hmuh chu ṭha zetin a tauh lut. Ramhlun North 3-0 a chakin point thum an hmu a, Chawnpui erawhin point an la hmu lo.

Ramhlun North coach Thantea chuan, "CRS vanga kan chhawr thei lo player-te an rawn let a, kan ṭangkaipui hle. Point thum avangin kan lawm a, hmasawn zel erawh kan mamawh," tiin an chak avanga a lawm thu a sawi.

Chawnpui FC coach HC Zarzoliana chuan, "Kan goal chhuahna a ho ang reng a, CRS vangin player pawimawh captain Mawitea leh Amawia te kan la chhawr theih lo kan tuar bawk. Chawlh a awm dawn a, he mi chhung hian insiamṭhat ngei kan intum ang," tiin a sawi.