Liverpool an vawk lal len

Premier League leh Liverpool sawi kawp a nihin, "Liverpool an chak," tih ṭawngkamin a chhunzawm tlangpui a, tun season chhung he ṭawngkam hi kan hmang reng dawn niin a lang. 

Liverpool hian an mikhual Southampton chu Inrinni zan khan 4-0 in an sawp a, Alex Oxlade-Chamberlain, Jordan Henderson leh Mohamed Salah (2) ten goal an khung. 

Jurgen Klopp-a nauten hnehna an chan leh tak avangin league match 25-ah point 73 an nei a, European top five league chanchinah match 25 leka heti zat point nei thei an awm ngai lo - Manchester City aiin point 22-in an sang fal a, nizana City inkhel result a zirin hei erawh danglam leh thei a ni. 

Liverpool boss Klopp chuan, "Ṭha famkim tia sawi tur chu kan ni lo. Kan theihnate a ṭha thei ang bera hman chhuah dan kan ngaihtuah a, kan duh angin kan la khel rih. Chuvanga heti zat point nei thei kan ni," tiin a sawi. 

Anfield-ah first half chungin goal a lut lo a, mahse chak ṭhang Liverpool fans leh players zingah hlauhthawnna a awm hran lo - an beisei leh rin ang ngeiin second half-ah goal an hmu zui. 

Second half ṭan aṭanga minute hnihna lekah Alex Oxlade-Chamberlain chuan goal hmahruai a rawn khung a, English midfielder hian Klopp-a 'plan' a tel chhunzawm zel tura a ṭhat tawkzia a pholang. 

Reds tan season duhawm tak hmangtu Jordan Henderson chuan minute 60-naah 'cool' zetin a khung ve leh a, Brazilian forward Roberto Firmino siamsak a ni.

Henderson hian Mohamed Salah khung tur a siamsak zui a, minute 90-naah Salah hian a goal hnihna a khung bawk. Saints hian Danny Ings leh Shane Long hmangin hun ṭha an nei a, 4-0 ngawta tlawm an phu lo. 

Kum 30 hnua league nomawi chawi leh mai thei dinhmuna ding mek Reds hian Premier League champion turin match hmabak 13 an la neihah vawi sarih chak chiah an mamawh tawh!

Season hmasa nena chhiar tel chuan Reds hian match 42 chhung chu a zawnin tlawm an nei tawh lo a, an match hnuhnung 10-ah vawi khat chiah goal an chhuah bawk. 

Liverpool-in first half an khel chhe takzet a, Saints hi an vanneih ṭum ni se goal khung thei an ni. Mahse, 'champion zia' kan sawi ṭhin kha a lang chhuak leh a, khelh chhiat ṭum pawha goal li khung theih hi eng team pawhin an duhthusam a ni ang. 

"Premier League-ah Liverpool an champion ang em?" tih chu zawhna a ni tawh lo a, "Tlawm nei loin nomawi an chawi thei ang em?" tih chu football ngainatuten ring fan chunga an thlir chu a ni ta. 

Liverpool striker hlui Danny Ings-a'n Anfield-ah Saints tan inkhel bul a ṭan a, Merseyside club tan English striker hian buaina a siam hnem hle.

 

Kum 27 mi striker hian Klopp-a hnuaiah hmun a chan phak loh avangin July khan Saints hi a ngheta khel turin pound maktaduai 20-in a zawm a, league match 19-a inkhel bul a ṭanah goal 14 a khung tawh!

Liverpool lakah pawh vawi li ngawt shot a nei a, key pass vawi thum a nei thei - a tlan tam a, a taima a, amah duh lotu Klopp meuhin Ings fakna thu a chhak chhuak. 

Anfield-a lawm hlawh tak striker hian 2015-ah England tan match khat a khel ve zawk tih loh chu Three Lions jersey a la ha leh lo a, Euro 2020-ah England tan koh a nih pawhin a mak lo ang.