Abraham-a hattrick, Rashford-a penalty

Chelsea-in Tammy Abraham hoin Inrinni zan khan club liante mualpho tawhna hmun Molineux Stadium an luhchhuah a, Frank Lampard-a hoten Wolverhampton Wanderers 5-2 in an sawp. Old Trafford-ah Manchester United-in penalty an hlawh chhuak a, Marcus Rashford-a'n hlah tawh loin Leicester City 1-0 a an hneh theihna chhan a ni.

Tottenham Hotspur-in an mualah Crystal Palace 4-0 in an sawp a, South Korea forward Son Heung-min-a'n goal hnih a khung. Premier League-ah Liverpool leh Manchester City ten champion nomawi an inchuh dawn niin a lang a, hetiang chiah hian Champions League khelh tuma inchuh Arsenal, Blues, Spurs leh United te inum boruak a sang dawn. Nizan khan Gunners-in Vicarage Road-ah Watford an hmachhawn.

Premier League match nga khelh tawhah Chelsea striker Tammy Abraham-a'n goal sarih a khung der tawh a, tawnhriat ngah zawk Olivier Giroud leh Michy Batshuayi te an awm reng laia amah ring ngamtu Blues manager Lampard-a'n fak a phu hle.

Kum 21 mi Abraham-a goal khungte hi goal ṭha tak vek a ni a, a bik takin hattrick siamna tura Wolves defender Conor Coady a bum ngam dan chuan a huaisenzia a pholang. Chelsea goal dang pahnih hi an academy chhuak tho Fikayo Tomori leh Mason Mount te khung a ni bawk.

Abraham hian loan-a Swansea tana a khelh ṭum khan Premier League-ah goal nga a khung a, season liam ta khan Aston Villa-ah loan thoa kalin Championship-ah goal 25 zet a khung. Tun season-ah goal sarih a khung tawh a, goal dangin a la chhunzawm zel ang.

Kum 21 mi Tomori hian minute 31-naah goal hmahruai hla tak aṭangin mawi zetin a khung a, Germany defender Antonio Rudiger chu tun season-a a match hmasa berah a inhliam avangin Tomori-a'n hmun pawimawh a chhang chho thei ang. Lampard-a'n Derby County aṭanga a rin tawh Mason Mount pawhin goal ngana mawi zetin a khung a, Chelsea ṭantu tan an player-te khelh danah lawmna tur a tam hle.

Chutihrualin Abraham-a'n an lama a tauh luh hnuah Patrick Cutrone-a'n Wolves tan a khung belh a, Chelsea-in tlarhnung inenfiah an mamawh takzet.

Manchester United-in Paul Pogba chhawr thei lo mah se an mikhual Leicester City chu minute 8-naa Marcus Rashford-a penalty hmangin an hneh a, goal dang an khung belh loh avangin Ole Gunnar Solskjaer hote hun tawp thlengin nuam sain an awm thei lo.

United-in Foxes an hmachhawn hma hian penalty vawi hnih an hlah tawh avangin Rashford-a penalty khung hi a pawimawh lehzual a, English forward hian second half-ah freekick aṭangin crossbar a pet per. Khawvel defender manto ber Harry Maguire chu a club hlui ṭantuten au el nasa mah se khelmualah a tih tur ṭha taka thawkin goal an chhuah lo.

United manager Ole Gunnar Solskjaer chuan, "A vawi khat nan hun tam zawk goal vengtu zawkah kan ṭang a, clean sheet hi a lawmawm. Chutihrualin hei aia khel ṭha thei kan ni a, hmasawn zel a ṭul," tiin a sawi a, player tlan chak Jamie Vardy veng hnehtu Maguire a fak tel bawk.