Subroto Cup-ah Mizoram an vanduai

Subroto Cup Under 17 mipa inelna quarterfinal-ah Mizoram chu hun pangngaiah Jharkhand nen 1-1 an inhnehtawk a, penalty shootout-ah 4-2 in an chak lo.

Delhi-a inelna neihah Mizoram hian knockout stage lut turin match hmasa berah goal awm loin Kerala nen an inhnehtawk a, hemi hnu hian Bangladesh (13-1), West Bengal (2-1) leh International Board Schools Sports Org (16-1) te hnehin goal difference 28 zet an nei. Amaherawhchu knockout stage-ah Mizoram hian Jharkhand lakah goal khung an harsat a, 1-1 in an inhnehtawk.

Mizoram hi SYS Football Academy, Lunglei te an ni a, Jharkhand hi SAIL Football Academy, Bokaro zirlai te an ni thung. Kumin Subroto Cup hi kum 60-na a ni a, Diamond jubilee edition-ah hian Saidan Secondary School, Mizoram te chu Under 14 mipa inelnaah an champion a, hmeichhe inelnaah Mizoram team pahnih SYS leh NCC (NER) tirhten first round an paltlang lo.