Liverpool chak laiin City an tlawm

Inrinni zan Premier League-ah beisei loh result a thleng a, season ṭantir aṭangin boruak a 'hot' nghal - Liverpool-in 3-1 a Newcastle United an hneh laiin Norwich City lakah 3-2 in Manchester City an tlawm thung!

Anfield-a inkhelah Liverpool-in goal chhuah hmasa zuk mah se Sadio Mane goal hnih leh Mohamed Salah hmangin an chhanglet nghal a, Magpies-in Reds an zuam sual. Premier League kai thar lakah Pep Guardiola nauten hnehna chan zawh loh kher chu an inring lo ang. Mahse, football-ah chuan eng pawh a thleng thei tih a takin pholan a ni a, City an mualpho. 

Norwich tan Kenny McLean, Todd Cantwell leh Teemu Pukki ten goal khat ṭheuh an khung a, City tana Sergio Aguero leh Rodri goal khungin awmzia a nei lo.

Anfield-a mipui thawm ṭha tak karah rin loh takin Newcastle an rawn lang thut a, Jetro Willems chuan minute sarihnaah ṭha zetin goal hmahruai a rawn khung. 

Magpies fan-te an lawm a, Liverpool hmuiah chi thlum an tat tih reng an inhre lo - Reds-in an dan pangngaiin na zetin an nawr let a, Steve Bruce naute tan dawl chi a ni lo. Mane chuan minute 28-naah si phurh sutna goal a rawn khung a, minute 40-naah a khung leh bawk - a goal hnuhnung zawk erawh Magpies goalkeeper Martin Dubravka puh tel theih a ni. 

Salah chuan minute 72-naah Roberto Firmino siamsak mawi zet chu goal-ah a chantir bawk a, Reds-in chak turin harsatna an nei lo. 

International break laiin Brazil tan Roberto Firmino a inlan a, Nilaini zing dar 10:30 khan match a khel zo ve chauh. Thawhlehni zan Champions League-ah Liverpool-in Napoli an lenchilh dawn bawk si a, Jurgen Klopp-a'n Brazilian forward hi bench-ah a dah.

Mahse, minute 37-naah hliam vangin Divock Origi lakchhuah a ngai a, Reds tan malsawmna a chang zui - Firmino a rawn lut a, Liverpool khelh dan a danglam nghal. Mane leh Salah goal khung tur a siamsak chu player thiam bik ke aṭanga chhuak tih hriat tak a ni a, vawi nga ngawt chance a rawn siam bawk. 

Salah-a'n inkhelh hmain twitter-ah Mane nen an inkarah buaina a awm lo tih video hmangin a pholang a, an khelh danin chu chu a hrilhfiah. 

Liverpool hian league match 14 chhung chu a zawnin hnehna an chang ta a, goal hnih aia tlem lo khung chunga Premier League-a chak zawn rei ber record an siam. Reds tan record um tur a la awm - match 18 a zawna chak thei City record a awm a, Premier League season tira a zawna match kua chak thei Chelsea an la phak lo bawk. 

Norwich City khelmuala lenglut Manchester City-in chak loh an inring lo ang - mahse Norwich hian 'City' dang an awm ve tih pholangin Manchester khaw club an hneh. 

Mualneitu team hian inkhel ṭantir aṭangin inven an tum hran lo a, rin loh takin City an ngam - minute 28 chhungin McLean leh bul ṭan ṭha tak Cantwell ten goal an rawn khung. Mak tiin City an hawihai a, Norwich fans thawm a ṭha thung. Mahse, first half tawp hma hretin tun season league match zawng zawnga goal la khung vek Sergio Aguero chuan beiseina chhi nung turin si phurh a sut ṭhen. 

Aguero-a'n goal a rawn khung hi chuan team lian zawk an nih miau avangin City hi chak tur zawka rinna a sang leh hman. 

Mahse maw... 

Norwich-in awlsam taka City chak tir an tum hauh lo. Premier League player of the month-a thlan hlim Teemu Pukki chuan club lian pawh a hlau lo tih pholangin an goal thumna a rawn khung. 

Pukki hian league match nga a khelhah goal ruk a khungna a ni a, hetih chhung hian vawi hnih assist a nei tel bawk - a hming kan hre zel ang. Hun tawp nan minute hnih chiah a awm tawh tihah Rodri chuan City tana a goal hmasa ber rawn khung ve leh mah se si phurh sut zawhna hun a awm tawh lo. 

Mualpho takin City an tlawm a, hmahruaitu Liverpool chu point ngain an phak ta lo - Pep-a'n hliam Aymeric Laporte tel loa khelh dan a hriat chhuah vat a ngai. 

Manchester City squad pumpui man belhkhawm hi pound maktaduai 906 a tling a, Norwich aiin a let 32-in an player man belhkhawm a tam zawk!

Inrinni zana inkhel bul ṭan bikah City squad hlutna chu £406.1m a ni a, Norwich erawh £6.45m a ni - Alexander Tettey, Emiliano Buendia leh Marco Stiepermann te kha Norwich player manto an ni a, £1.5m man ṭheuh an ni. 

City tana bul ṭan zingah Oleksandr Zinchenko chu (£3.4m) man tlawm ber a ni a, a bak zawng erawh £20m man aia hniam an awm lo. 

Pep naute tana pawi ber erawh Norwich-in 'Sum ngah ngah hmelṭha' tih an lo la hre ve lo a, huaisen takin City an ngam.