Tyson Fury hneh thei an awm lo

British boxer rothap Tyson Fury chuan nimin zing khan Otto Wallin chu unanimous decision (116-112 117-111 118-110) hmangin a hneh a, vawi 30 inhnek a hmachhawn tawhah a la tlawm lo.

Kum 28 mi Wallin tan erawh inhnek a hmachhawn tawh vawi 21-a a tlawm vawi khatna a ni thung a, British boxer tan harsatna thlen mah se hnehna chang meuh tur chuan a harsa a ni. Fury chuan, "Wallin hi vawi 20 inhnek a hmachhawn tawha la tlawm lo a ni a, tlawm dan a la thiam lo. Mahse, boxer ṭha zawk min hmachhawn a ni," a ti. 

T-Mobile Arena-a inhnekah Fury hian awlsam takin hnehna a chang bik lo. Round thumnaah Wallin hian a mit ko chungah na zetin a hnek a, thi a chhuak nasa hle. Fury hi a mit ko kakin a ti buai tih hai rual a ni lo - medical team lamin sixth round-ah a hliam hi an en dik a ṭul a, round sarihna ṭan dawnah an ennawn leh bawk. 

Inhnek kha tihtawp ni ta se chuan Wallin kha technical knockout hmanga chak tur a ni ang - mahse Fury-a'n amah ṭantute beiseina a ti hlawh chham lo a, hliampui karah hnehna a chang. Fury chuan, "Fight ropui tak a ni. Ka mit ko a hnek fuh avang khan thil tam tak a danglam a, ka meng ṭha thei lo hial a ni. Round 12 hautak zet kan khel a, ka theih chuan hmalam ka pan zel ang," a ti. 

Wallin chuan, "Ka theihna zawng zawng ka pe a, Tyson hi champion ropui tak a lo ni e. Mahse, ka huaisenna leh fighter ṭha tak ka nihna chu tuman an hnial thei tawh lo ang," a ti a, chak lo mah se a khelh danah a lawm. Fury chuan, "Deontay Wilder, hmachhawn leh ka duh hmasak ber chu i ni," tiin WBC heavyweight champion a cho nghal a, February 22-a hmachhawn a duh thu thlengin a sawi!

Hetihlai hian WBA, IBF, WBO leh IBO champion Andy Ruiz chuan, "Khatiang kha chuan a kut phuar chungin engtinnge min hneh theih ang?" tiin Fury chungchang a lo sawi ve bawk. Fury hian Wallin nen an inhnek hma hian Ruiz hi, "Ka kut lehlam ṭawn bet chung pawhin ka hneh ang," tiin a lo sawi tawh a ni!

Tyson-a pa John Fury chu a fapa khelh danah a lawm bik lo. John chuan, "Tyson-a chhiat ber ṭum a ni. A chakna leh thahrui hmuh tur a awm lo a, ka thu angin kal se chuan Tyson-a 'team' te hi amah enkawl turin an awm tawh lo ang," a ti a, a fapa chu Wallin laka harsa taka chak turah a ngai lo.