Chhinga Veng = Venghnuai

Mizoram Premier League Season 8-ah season hnuhnung pahnih finalist Chhinga Veng leh kai thar FC Venghnuai te chu Zirtawpni zan khan 1-1 in an inhnehtawk. Coach Lalrindika Ralte enkawl Venghnuai hian MPL-ah hnehna la chang lo mah se champion rinkai zinga mi Electric Veng an chelh tawh a, hneh loh an la tawng lo.

India ram state hrang hrang football hmanga inelna sang Santosh Trophy khelh a nih dawn avangin MPL chawlh rih a ni dawn a, October 3-ah khelh a ni leh dawn chauh. Match hnih khelh tawhah Mizoram Police chiah chak ve ve thei an awm a, match riat khelh tawhah vawi li lai inhnehtawk a awm tawh a ni.

FC Venghnuaiin MPL top scorer pawh ni tawh Laldampuia bul an ṭantir a, Vanlalthanga an neih sa bawk avangin kai thar hi team te an ni tawh lo. Chhinga Veng pawhin an foreigner Ivorian forward Quattara Sie bul 

an ṭantir bawk.

Chhingcows-in Vanlalchhuanga leh MC Malsawmzuala te hmangin Venghnuai tlarhnung an rum ṭhaih a, Dampuia pawhin Venghnuai tana inlan hmasa berah goal a khung teuh hle. Goal erawh first half injury time-ah hmuh a ni a, FC Venghnuaiin an zir ang thlapin freekick aṭangin an khung.

Ball pet thiam Thanga chu freekick pet turin a ding a, goal-a pet phak ni mah se Lalhmangaiha (Tete-a) umluh turin a pe a, Tete-a hian goal-ah petin Chhingcows keeper Lalruatpuia (Mama) dan per chu defender Lalruatfela'n a khung. Lammualah Venghnuai mipui an tam a, thawm a ṭha hle.

Chhinga Vengin team tih chak nan foreigner an lalut a, Ivorian forward Quattara Sie-a'n Mizo club tana a bul ṭan hmasa berah goal a khung. Minute 51-naah Chhingcows midfielder KC Larchhuakmawia ball vawrhluh chu Quattara Sie-a'n dawng fuh tawk lo mah se Venghnuai defender-te'n an hnaih chilh nghal loh avangin Ivorian forward hian a ke dinglamin a khung.

Chhinga Veng leh Venghnuai an intluk tawk a, goal dang hmuh tur a awm lo. Inkhelh lai leh inkhelh bana langsar chu Venghnuai mipui an ni a, khelmual pawnah Chhinga Veng mipuiin an tluk lo.