Goal hnih hum thei lo Arsenal

Pierre-Emerick Aubame-yang-a goal hnih vangin Arsenal lawm hman viau mah se rei a daih lo. Gunners beiseina chu Watford player-te huaisenna hmanga hliahkhuh a ni a, manager thar Quique Sanchez Flores naute nen 2-2 in an inhnehtawk.

Pathianni zan Premier League inkhelah table mawngphah luahtu Watford tan Tom Cleverley leh Roberto Pereyra ten an si phurh an sut a, league match nga an khelh aṭangin point hnih an hmu - a hnuai berah an la awm chhunzawm.

Inkhel dangah Bournemouth chuan an mual Vitality Stadium-ah Callum Wilson-a goal hnih leh substitute Ryan Fraser goal khat hmangin Everton 3-1 in an hneh, mikhual team tana Dominic Calvert-Lewin goal khungin point a hlawh chhuak zo lo.

Hliam vangin Arsenal tan Alexandre Lacazette a inlan thei lo a, Gabon striker Aubameyang chu tlarhma laiah dah niin, a thlawp tur hian a hnungah Mesut Ozil leh Dani Ceballos te an awm, pound maktaduai 72 man Nicolas Pepe chu mual sir lamah a awm bawk.

Minute 21-naah Aubameyang-a'n defender Sead Kolasinac hnen aṭanga a ball hmuh chu rang taka vir puin a pet thut a, keeper Ben Foster tan dan hman a ni lo, striker hriam a nih zia lantir nan hun ṭha a neih hmasa berah goal a khung nghal.

Arsenal an khel ṭha chhunzawm a, manager Unai Emery duh dan ang ngeiin tlarhnung aṭanga ball inpe kual ṭanin, vawi 20 an inpek kual hnuah Auba bawkin a hmawr a bawk. Gunners inkhel cheimawitu chu Ozil a ni - Real Madrid midfielder hlui hi a la thiam reng.

Goal hnih an phurh hnuah Watford an tlawm lo, manager Sanchez Flores-a'n chawlhlawk laiin a naute a fuih ṭha tih a chiang a, second half-ah team dang daih ang maiin an khel chhuak. Huaisen taka an beih ngam vangin point khat hlu tak an sual chhuak a ni.

Keeper Bernd Leno bula ding Sokratis Papastathopoulos ball pet chhuah chu Gerard Deulofeu-a'n lo khawih per hmanin Cleverley chuan hnai tak aṭangin an siphurh a sut ṭhen. Keeper aṭanga ball an pet chhuah dan ngai bawk hian goal an chhuah hmain Matteo Guendouzi chuan a tisual a, Gunners-in an fimkhur loh rah an seng.

Watford an phur zual a, minute 81-naah counter attack hmang ṭangkaiin na takin an vaw let. Defender David Luiz chuan ṭul lo takin box chhung chiahah Pereyra a ti tlu, Argentine midfielder hian harsatna nei loin a penalty hlawhchhuah chu si phurh sut nan a hmang.

Goal hnih an neih hnuah an hum zo lo a, mualpho taka khelmual an chhuahsan hnuah Unai Emery chuan an tihsual chu ama mawhphurhna leh a thu tlukna siam vang a nih thu a sawi.

Spanish manager hian midfielder pahnih Ozil leh Ceballos te la chhuakin tawnhriat nei tlem zawk Joe Willock leh Reiss Nelson ta a dahlut a, anni pahnih hi tlarhnung lam venpuitu ni loin goal nawrtu an ni - holam taka ball an hloh an nei fo.

Arsenal manager hian attacking game a ngaina tih chu a lang chiang a, goal khung pawh an harsat lutuk hran lo. Mahse, a khung an awlsam tluk zetin a chhuah pawh an awlsam! Gunners defender pahnihin tihsual lian tak an nei ngei mai, chutih rualin khelh dan phung nghet nei rih lo coach chungah mawhphurhna a lian hle.

Watford-in league match hmasa paliah point khat chauh an hmuh avangin coach Javi Gracia banin, tun hma lama an manager hlui Quique Sanchez Flores an ko kir. Spanish manager hian hna tam tak a la thawk hman lo, chutih rualin player rilru erawh nasat takin a thlak tih a hriat.

Hornets hian Arsenal lakah goal khung tumin vawi 31 ngawt an pet a, target zawnah ṭum 10 a kal. Kum 2001 aṭanga Opta Sports-in statistics mumal tak a neih hnuah, Gunners-in match khat chhunga goal shot an hmachhawn tam ber ṭum an tawng hial.

Watford coach Flores chuan, "Premier League boruak nuam leh nung tak ka tem leh ta, team ṭha lakah point hlu tak kan hmu. Ka naute khelh danah ka lungawi hle, rilru put hmang a dik a, inrintawkna min siam sakin hmalam kan pan ang," a ti.